ಡೈಲಿ ವಾರ್ತೆ: 12/ಮೇ /2024
ಕೋಟ: ಅನಾಥ ಲಾರಿಯಿಂದ ಅಪಘಾತದ ಭಯ.!
ಕೋಟ ಪೆಟ್ರೋಲ್ ಬಂಕ್ ಎದುರುಗಡೆ ರಾಷ್ಟ್ರೀಯ ಹೆದ್ದಾರಿ ಪಕ್ಕದಲ್ಲಿ ಸುಮಾರು 15 ದಿನದಿಂದ ಲಾರಿಯೊಂದು ಅನಾಥವಾಗಿ ನಿಂತಿದೆ.
ಗುಜರಾತ್ ರಾಜ್ಯದ ರಿಜಿಸ್ಟ್ರೇಷನ್ ನಂಬರ್ ಹೊಂದಿದ ಈ ಖಾಲಿ ಲಾರಿ ಉಡುಪಿ ಕಡೆಯಿಂದ ಬಂದು ಕುಂದಾಪುರ ಕಡೆಗೆ ಮುಖ ಮಾಡಿ ನಿಂತಿರುತ್ತದೆ.
ಚಾಲಕ ನಾಪತ್ತೆ: ಈ ಲಾರಿ ಬಹಳ ದಿನಗಳಿಂದ ಕದಲದೇ ನಿಂತಿದ್ದರೂ ಪೊಲೀಸರಾಗಲಿ, ಹೈವೇ ಗಸ್ತಿನವರಾಗಲಿ, ರಾಷ್ಟ್ರೀಯ ಹೆದ್ದಾರಿ ಇಲಾಖೆಯವರಾಗಲಿ ಗಮನಿಸದೆ ಇದ್ದುದು ಆಶ್ಚರ್ಯ ಉಂಟುಮಾಡಿದೆ. ಲಾರಿಯ ಕೆಳಗಡೆ ಬರೆದ ನಂಬರ್ ಗೆ ಎಷ್ಟೇ ಕರೆ ಮಾಡಿದರೂ ಯಾರೂ ಕರೆ ಸ್ವೀಕರಿಸುತ್ತಿಲ್ಲ.
ಈ ಲಾರಿಯಿಂದಾಗಿ ಹೆದ್ದಾರಿಯಲ್ಲಿ ಸಂಚರಿಸುವ ವಾಹನಗಳಿಗೆ ಅಪಾಯ ತಪ್ಪಿದ್ದಲ್ಲ. ಪಕ್ಕದಲ್ಲೇ ಪೆಟ್ರೋಲ್ ಬಂಕ್ ಇದ್ದು ಅಲ್ಲಿಗೆ ಪೆಟ್ರೋಲ್ ಡೀಸೆಲ್ ಹಾಕಿಸಲು ಬರುವ ವಾಹನಗಳಿಂದಾಗಿ ಅಪಘಾತಗಳು ಸಂಭವಿಸುವ ಸಂದರ್ಭಗಳು ಇವೆ.
ಇನ್ನಾದರೂ ಸಂಬಂಧಪಟ್ಟ ಅಧಿಕಾರಿಗಳೂ ಎಚ್ಚೆತ್ತುಕೊಂಡು ಲಾರಿ ಬಗ್ಗೆ ಕೂಲಂಕುಷವಾಗಿ ತನಿಖೆ ಮಾಡಿ ಲಾರಿಯನ್ನು ತೆರವು ಗೊಳಿಸಿ ಮುಂದೇ ಆಗುವ ಅನಾಹುತವನ್ನು ತಪ್ಪಿಸಬೇಕಾಗಿ ಸಾರ್ವಜನಿಕರು ಕೇಳಿಕೊಂಡಿದ್ದಾರೆ.