ಡೈಲಿ ವಾರ್ತೆ:03 ಸೆಪ್ಟೆಂಬರ್ 2023
ಆಟೋ ರಿಕ್ಷಾದಲ್ಲಿ ಸಿಕ್ಕಿದ ಮೊಬೈಲ್ ನ್ನು ಪ್ರಯಾಣಿಕರಿಗೆ ಹಿಂದಿರಿಗಿಸಿ ಪ್ರಾಮಾಣಿಕತೆ ಮೆರೆದ ಮಣಿಪಾಲದ ಆಟೋ ಚಾಲಕ ಅಬ್ದುಲ್ ರಶೀದ್
ಮಣಿಪಾಲ: ಮಣಿಪಾಲದ ಸತ್ಕಾರ ಆಟೋ ನಿಲ್ದಾಣದಿಂದ ಪೆರಂಪಳ್ಳಿ ಕಡೆಗೆ ಪ್ರಯಾಣಿಸಿದ್ದ ಮಹಿಳಾ ಪ್ರಯಾಣಿಕರೋರ್ವರು ತನ್ನ ಮೊಬೈಲ್ ನ್ನು ಮರೆತು ಆಟೋ ರಿಕ್ಷಾದಲ್ಲಿ ಬಿಟ್ಟು ಹೋಗಿದ್ದರು. ರಿಕ್ಷಾ ಮರಳಿ ಸ್ಟ್ಯಾಂಡ್ ಗೆ ಬಂದಾಗ ಆಟೋದಲ್ಲಿ ಮೊಬೈಲ್ ಫೋನ್ ಸೆಟ್ ಇರುವುದನ್ನು ಚಾಲಕ ರಶೀದ್ ಗಮನಿಸಿದರು. ಇದು ಸ್ವಲ್ಪ ಮೊದಲು ಪೆರಂಪಳ್ಳಿ ಕಡೆಗೆ ಪ್ರಯಾಣಿಸಿದ್ದ ಮಹಿಳೆಯದೇ ಎಂಬುದನ್ನು ಗ್ರಹಿಸಿದ ಅಬ್ದುಲ್ ರಶೀದ್ ಆಕೆಯನ್ನು ಪತ್ತೆ ಮಾಡಿ ಮೊಬೈಲ್ ಅವರದೇ ಎಂದು ಖಾತ್ರಿಪಡಿಸಿಕೊಂಡು ಮರಳಿಸಿದರು. ಇಳಿಯುವ ಗಡಿಬಿಡಿಯಲ್ಲಿ ರಿಕ್ಷಾದಲ್ಲೇ ಮೊಬೈಲ್ ಬಿಟ್ಟಿದ್ದು, ಅದನ್ನು ಪ್ರಾಮಾಣಿಕತೆಯಿಂದ ಮರಳಿಸಿದ ರಿಕ್ಷಾ ಚಾಲಕ ಅಬ್ದುಲ್ ರಶೀದ್ ಅವರ ಪ್ರಾಮಾಣಿಕತೆಯನ್ನು ಕೊಂಡಾಡಿದ ಮಹಿಳೆ ಅವರಿಗೆ ಕೃತಜ್ಞತೆ ಸಲ್ಲಿಸಿದ್ದಾರೆ.
ಆಟೋ ಚಾಲಕ ಅಬ್ದುಲ್ ರಶೀದ್ ಅವರ ಪ್ರಾಮಾಣಿಕತೆಗಾಗಿ ರಿಕ್ಷಾ ಚಾಲಕ ಸಂಘದ ಸದಸ್ಯರು ಅವರನ್ನು ಅಭಿನಂದಿಸಿದ್ದಾರೆ.