ಡೈಲಿ ವಾರ್ತೆ: 02 ಮೇ 2023
ಮಳೆಗೆ ಕುಸಿದ ಮನೆ: ನವಜಾತ ಶಿಶು ಸೇರಿ ಇಬ್ಬರು ಮೃತ್ಯು!
ಕೊಪ್ಪಳ : ಮನೆ ಕುಸಿದು ಬಿದ್ದ ಪರಿಣಾಮ ಹಸುಗೂಸು ಸಹಿತ ಇಬ್ಬರು ಮೃತಪಟ್ಟ ಘಟನೆ ಜಿಲ್ಲೆಯ ಕನಕಗಿರಿ ತಾಲೂಕಿನ ಜೀರಾಳ ಗ್ರಾಮದಲ್ಲಿ ಇಂದು ಬೆಳಗ್ಗಿನ ಜಾವ ಸಂಭವಿಸಿರುವುದು ವರದಿಯಾಗಿದೆ.
ಮೃತರನ್ನು ಕನಕಮ್ಮ ಎಂಬವರ 24 ದಿನಗಳ ಹೆಣ್ಣು ಮಗು ಮತ್ತು ಕನಕಮ್ಮರ ತಾಯಿ ಫಕೀರಮ್ಮ ತಿಮ್ಮಣ್ಣ ಭೋವಿ(60) ಎಂದು ಗುರುತಿಸಲಾಗಿದೆ. ಕನಕಮ್ಮರ ಕಾಲು ಮುರಿದಿದ್ದು, ಅವರನ್ನು ಆಸ್ಪತ್ರೆಗೆ ದಾಖಲಿಸಲಾಗಿದೆ.
ಎರಡು ದಿನಗಳ ಹಿಂದೆ ಜೀರಾಳ ಗ್ರಾಮದಲ್ಲಿ ಉತ್ತಮ ಮಳೆ ಸುರಿದಿತ್ತು. ಮಳೆಯಿಂದ ಮನೆಯ ಗೋಡೆಗಳು ನೆಂದಿದ್ದವು. ಇಂದು ಮುಂಜಾನೆ ಬೀಸಿದ ಗಾಳಿಗೆ ಏಕಾಏಕಿ ಮನೆಯ ಸಿಮೆಂಟ್ ಶೀಟುಗಳು ಮನೆಯೊಳಗೆ ಮಲಗಿದ್ದವರ ಮೇಲೆ ಬಿದ್ದಿದೆ. ಇದರಿಂದ ಫಕೀರಮ್ಮ ಸ್ಥಳದಲ್ಲೇ ಮೃತಪಟ್ಟಿದ್ದರೆ, ಮಗು ಆಸ್ಪತ್ರೆಗೆ ಸಾಗಿಸುವ ದಾರಿಮಧ್ಯೆ ಕೊನೆಯುಸಿರೆಳೆಯಿತೆನ್ನಲಾಗಿದೆ.