ಡೈಲಿ ವಾರ್ತೆ:06 ಮೇ 2023
ಸೌದಿ ಅರೇಬಿಯಾದ ನಿವಾಸವೊಂದರ ಕಟ್ಟಡದಲ್ಲಿ ಬೆಂಕಿ:
ಇಬ್ಬರು ಮಲಯಾಳಿಗಳು ಸೇರಿ 6 ಮಂದಿ ಭಾರತೀಯರು ಜೀವಂತ ದಹನ!
ರಿಯಾದ್:ಸೌದಿ ಅರೇಬಿಯಾದ ರಿಯಾದ್‌ನಲ್ಲಿ ಕಟ್ಟಡವೊಂದರಲ್ಲಿ ಬೆಂಕಿ ಕಾಣಿಸಿಕೊಂಡು ಮಲಯಾಳಿಗಳು ಸೇರಿದಂತೆ ಆರು ಮಂದಿ ಸಜೀವ ದಹನವಾಗಿರುವ ಘಟನೆ ನಡೆದಿದೆ.
ರಿಯಾದ್ ಖಾಲಿದಿಯಾದ ಪೆಟ್ರೋಲ್ ಪಂಪ್ ಬಳಿಯ ನಿವಾಸದಲ್ಲಿ ಸಂಭವಿಸಿದ ಬೆಂಕಿಯಲ್ಲಿ ಇಬ್ಬರು ಮಲಯಾಳಿಗಳು ಸೇರಿದಂತೆ ಆರು ಭಾರತೀಯರು ಸಾವನ್ನಪ್ಪಿದ್ದಾರೆ. ಮಲಪ್ಪುರಂ ಕುಟ್ಟಿಪ್ಪುರಂ ಪಂಚಾಯಿತಿಯ ವಳಂಚೇರಿ ಪೈಂಕನ್ನೂರ್ ತರಕ್ಕಲ್ ಯೂಸುಫ್ ಅವರ ಪುತ್ರ ಅಬ್ದುಲ್ ಹಕೀಂ (31) ಮತ್ತು ಮೇಲ್ಮುರಿ ನಿವಾಸಿ ಇರ್ಫಾನ್ ಹಬೀಬ್ (33) ತಮಿಳುನಾಡು ಮೂಲದ ಕಾರ್ತಿಕ್, ರಾಜಗೋಪಾಲ್, ಗುಜರಾತ್ ಮೂಲದ ಯೋಗೇಶ್ ಕುಮಾರ್ ಮಿಸ್ತ್ರಿ, ಮಹಾರಾಷ್ಟ್ರ ಮೂಲದ ಅಶರ್ ಅಲಿ ಮೊಹಮ್ಮದ್ ಶೇಖ್ ಮೃತಪಟ್ಟವರು.
ಶುಕ್ರವಾರ ನಸುಕಿನ 1.30ರ ಸುಮಾರಿಗೆ ಈ ಘಟನೆ ನಡೆದಿದೆ. ಮೃತರು ಪೆಟ್ರೋಲ್ ಪಂಪ್‌ನ ಉದ್ಯೋಗಿಗಳಾಗಿದ್ದು, ತಾವು ವಾಸಿಸುತ್ತಿದ್ದ ಮನೆಯಲ್ಲಿ ಅಗ್ನಿ ಅವಘಢಕ್ಕೆ ಬಲಿಯಾಗಿದ್ದಾರೆ ಎಂದು ವರದಿಯಾಗಿದೆ.
ಪ್ರಾಥಮಿಕ ವರದಿಗಳ ಪ್ರಕಾರ, ಕಟ್ಟಡದಲ್ಲಿ ಶಾರ್ಟ್ ಸರ್ಕ್ಯೂಟ್ ಬೆಂಕಿಗೆ ಕಾರಣವಾಗಿದೆ ಎಂದು ತಿಳಿಯಲಾಗಿದೆ.
ಮೃತದೇಹಗಳನ್ನು ಮರಣೋತ್ತರ ಪರೀಕ್ಷೆಗಾಗಿ ಅಲ್-ಶುಮೈಸಿ ಆಸ್ಪತ್ರೆಯಲ್ಲಿ ಇರಿಸಲಾಗಿದೆ ಅಲ್ಲದೆ
ಮೃತದೇಹವನ್ನು ಭಾರತಕ್ಕೆ ತರುವ ಪ್ರಯತ್ನಗಳು ನಡೆಯುತ್ತಿದೆ.