ಡೈಲಿ ವಾರ್ತೆ: 29 ಮೇ 2023
ಶಿವಮೊಗ್ಗ: ಗುಡುಗು ಮಿಂಚು ಗಾಳಿಗೆ ಧರೆಗೆ ಉರುಳಿದ ಮರಗಳು
ಶಿವಮೊಗ್ಗ:ಇಂದು ನಗರದಲ್ಲಿ ಸಂಜೆ ಆರ್ಭಟಿಸಿದ ಗುಡುಗು ಮಿಂಚು ಹಾಗೂ ಗಾಳಿಗೆ ಮರಗಳು ಧರೆಗೆ ಉರುಳಿದ್ದು ಬಿಟ್ಟರೆ ತಂಪೆರುಗುವಷ್ಟು ಮಳೆಯಾಗಿಲ್ಲ.
ಸಂಜೆ 5-45 ರ ವೇಳೆಗೆ ಗುಡುಗು ಮಿಂಚು ಮತ್ತು ಗಾಳಿ ಆರ್ಭಟಕ್ಕೆ ಮರಗಳು ಧರೆಗೆ ಉರುಳಿದೆ.
ಮರ ಧರೆಗೆ ಉರುಳಿ ವಾಹನದ ಮೇಲೆ ಬಿದ್ದು ವಾಹನಗಳು ಜಖಂ ಆಗಿ ಟ್ರಾಫಿಕ್ ಜಾಮ್ ಆಗಿವೆ.
ಮ್ಯಾಕ್ಸ್ ಆಸ್ಪತ್ರೆಯ ರಸ್ತೆಯಲ್ಲಿ ಮರ ಧರೆಗೆ ಉರುಳಿ ಕಾರುಗಳ ಮೇಲೆ ಉರುಳಿ ಬಿದ್ದಿದೆ. ಇದರಿಂದ ಕಾರಿನ ಗಾಜುಗಳು ಜಖಂ ಆಗಿವೆ. ಜೊತೆಗೆ ವಾಹನಗಳ ಸಂಚಾರ ಅಸ್ತವ್ಯಸ್ತಗೊಂಡಿದೆ.
ಅದರಂತೆ ದೈವಜ್ಞ ಕಲ್ಯಾಣ ಮಂದಿರದ ಹಿಂಭಾಗವಿರುವ ಮೇಳಿಗೆ ಆಸ್ಪತ್ರೆಯ ಬಳಿಯಿರುವ ರಾಯಲ್ ಮೆಡಿಕಲ್ ಶಾಪ್ ಮಾಲೀಕರ ಮನೆಯ ಕಾಂಪೌಂಡ್ ನಲ್ಲಿದ್ದ ತೆಂಗಿನ ಮರ ಉರುಳಿಬಿದ್ದಿದ್ದು ಕಾಂಪೌಂಡ್ ಹಾಳಾಗಿದೆ ಯಾರಿಗೂ ಹಾನಿ ಉಂಟಾಗಿಲ್ಲವೆಂದು ತಿಳಿದು ಬಂದಿದೆ.
ಅದರಂತೆ ಹೊಸಮನೆಯ 6 ನೇ ತಿರುವಿನಲ್ಲಿರುವ 1 ನೇ ಮತ್ತು 4 ನೇ ಅಡ್ಡರಸ್ತೆಯಲ್ಲಿ ಮರದ ಕೊಂಬೆಗಳು ಮುರಿದು ಬಿದ್ದಿದೆ. ಸೋಮಿನಕೊಪ್ಪ ಭೋವಿ ಕಾಲೋನಿಯಲ್ಲಿನ ಗೋಪಿನಾಥ್ ಎಂಬುವರ ಮನೆಯ ಮೇಲ್ಛಾವಣಿ ಹಾರಿಹೋಗಿದೆ. ಸಧ್ಯಕ್ಕೆ ಯಾವುದೇ ಸಾವು ನೋವಿನ ವರದಿಯಾಗಿಲ್ಲ.