ಡೈಲಿ ವಾರ್ತೆ:18 ಜುಲೈ 2023
ಕುಂದಾಪುರ: ಚಲಿಸುತ್ತಿದ್ದ ಗೂಡ್ಸ್ ರೈಲಿಗೆ ಅಡ್ಡ ನಿಂತು ಆತ್ಮಹತ್ಯೆಗೆ ಯತ್ನಿಸಿದ ಯುವಕ – ರೈಲ್ವೆ ಸಿಬ್ಬಂದಿಗಳಿಂದ ರಕ್ಷಣೆ!
ಕುಂದಾಪುರ: ಇಲ್ಲಿಗೆ ಸಮೀಪದ ಕಾಳಾವಾರ ಎಂಬಲ್ಲಿ ಕಳೆದ ರಾತ್ರಿ ಸುಮಾರು 9 ಗಂಟೆಗೆ ಗೂಡ್ಸ್ ರೈಲು ಬರುವಾಗ ಹಳಿಯ ಮಧ್ಯದಲ್ಲಿ ನಿಂತು ಕೊಂಡಿದ್ದ ಯುವಕನೋರ್ವ ರೈಲಿನ ಹಾರ್ನ್ ಶಬ್ದ ಹಾಕಿದ್ದರೂ ಹಳಿಯಿಂದ ಕದಲುತ್ತಿರಲಿಲ್ಲ. ಇದನ್ನು ನೋಡಿದ ರಾತ್ರಿ ಪಾಳಿ ಗಸ್ತು ನಿರ್ವಹಿಸುತ್ತಿದ್ದ ಕುಂದಾಪುರ ರೈಲ್ವೆ ಸಿಬ್ಬಂದಿ ನಿತ್ಯಾನಂದ ಜಿ ಮತ್ತು ಅವರ ಸಿಬ್ಬಂದಿಗಳು 200 ಮೀಟರ್ ಓಡಿ ಹೋಗಿ ಯುವಕನನ್ನು ಹಳಿಯಿಂದ ಹೊರ ಎಳೆದು ಆತನ ಪ್ರಾಣ ರಕ್ಷಿಸಿದ್ದಾರೆ.
ಎಳೆದ ರಭಸಕ್ಕೆ ಕೈ ಹಾಗೂ ಭುಜಕ್ಕೆ ಸ್ವಲ್ಪ ಗಾಯವಾಗಿದ್ದು, ಜೀವಾಪಾಯದಿಂದ ಪಾರಾಗಿದ್ದಾನೆ. ಬಳಿಕ ಸಿಬ್ಬಂದಿಗಳು ರೈಲ್ವೇ ಗೇಟಿಗೆ ಕರೆದುಕೊಂಡು ಹೋಗಿ ರೈಲ್ವೆ ಸಿಬ್ಬಂದಿ ಜಗದೀಶ್ ದೇವಾಡಿಗ 108 ಕ್ಕೆ ಪೋನ್ ಮಾಡಿ ಆಸ್ಪತ್ರೆಗೆ ಸಾಗಿಸಲು ಸಹಾಯ ಮಾಡಿದ್ದಾರೆ. ಯುವಕ ಸ್ವಲ್ಪ ಮಾನಸಿಕ ಅಸ್ವಸ್ಥನಾಗಿದ್ದು ಯಾವುದೇ ಮಾಹಿತಿ ನೀಡಿರುವುದಿಲ್ಲ ಆತನನ್ನು ಉಡುಪಿ ಅಜ್ಜರಕಾಡು ಆಸ್ಪತ್ರೆಗೆ ಸೇರಿಸಲಾಗಿದೆ ಎಂದು ತಿಳಿದು ಬಂದಿದೆ