ಡೈಲಿ ವಾರ್ತೆ:30 ಆಗಸ್ಟ್ 2023
ವರದಿ : ವಿದ್ಯಾಧರ ಮೊರಬಾ
ಅಂಕೋಲಾ: ಕೊಗ್ರೆಯ ಮನೆಯೊಂದರಲ್ಲಿ ಕಳ್ಳತನಕ್ಕೆ ಡೋರ್‍ಲಾಕ್ ಮುರಿದು ಒಳಗೆ ನುಗ್ಗಿದ ಕಳ್ಳರು – ಮನೆಯವರು ಮುಂಜಾಗ್ರತೆಯಿಂದ ಬರಿಗೈಯಲ್ಲಿ ವಾಪಾಸದ ಖದಿಮರು.!
ಅಂಕೋಲಾ : ತಾಲೂಕಿನ ಬಾಸಗೋಡ ಗ್ರಾಪಂ.ವ್ಯಾಪ್ತಿಯ ಕೊಗ್ರೆಯ ಎಂ.ಎನ್. ಫಾರ್ಮನಲ್ಲಿಯ ಮನೆಯ ಮುಂದಿನ ಬಾಗಿಲಿನ ಇಂಟರಲಾಕ್ ಮುರಿದು ಒಳಗೆ ಪ್ರವೇಶಿಸಿ ಕಪಾಟುಗಳಲ್ಲಿದ್ದ ಬಟ್ಟೆ ಮತ್ತು ಮನೆ ಪರಿಕರಗಳನ್ನು ಚಲ್ಲಾಪಿಲ್ಲಿಯಾಗಿ ಎಸೆದು ಕಳ್ಳತನಕ್ಕೆ ಪ್ರಯತ್ನಿಸಿದ್ದ ಘಟನೆ ಕುರಿತು ಬುಧವಾರ ಪ್ರಕರಣ ದಾಖಲಾಗಿರುವ ಘಟನೆ ನಡೆದಿದೆ.
ಕಾರವಾರ ಕಡಲ ಜೀವಶಾಸ್ತ್ರ ಮಹಾವಿದ್ಯಾಲಯದ ನಿವೃತ್ತ ಪ್ರಾಧ್ಯಾಪಕ ಕೊಗ್ರೆಯ ವೆಂಕಟರಾಯ ನಾರಾಯಣ ನಾಯಕ (ಎನ್.ವಿ.ನಾಯಕ) ಎನ್ನುವವರ ಮನೆಯೇ ಯಾರೋ ಕಳ್ಳರು ಕಳ್ಳತನಕ್ಕೆ ಪ್ರಯತ್ನಿಸಿದ್ದಾರೆ. ಆದರೆ ಮನೆಯಲ್ಲಿ ನಗದು ಹಾಗೂ ಬಂಗಾರ ಇಡದೆ ಮನೆಯವರು ಮುಂಜಾಗ್ರತೆ ವಹಿಸಿದ್ದರು.
ಮನೆಯ ಮಾಲೀಕರು ಭಾನುವಾರ ಸಂಜೆ ಬೆಂಗಳೂರಿಗೆ ಹೋಗಿ ಮನೆಗೆ ವಾಪಸ್ ಆಗುವರಷ್ಟರಲ್ಲಿ ಈ ಕಳ್ಳತನದ ಘಟನೆ ನಡೆದಿದೆ. ಈ ಕುರಿತು ಎನ್.ವಿ.ನಾಯಕ ಅವರು ಬುಧವಾರ ಪೊಲೀಸ್ ಠಾಣೆಗೆ ದೂರು ಸಲ್ಲಿಸಿದ್ದಾರೆ. ಪ್ರಕರಣವನ್ನು ಪಿಐ ಸಂತೋಷ ಶೆಟ್ಟಿ ಅವರ ಮಾರ್ಗದರ್ಶನದಲ್ಲಿ ಪಿಎಸ್‍ಐ ಜಯಶ್ರೀ ಪ್ರಭಾಕರ ಪ್ರಕರಣವನ್ನು ದಾಖಲಿಸಿಕೊಂಡು ತನಿಖೆ ಕೈಗೊಂಡಿದ್ದಾರೆ.
ಮನೆಗಳ್ಳತನ ಮತ್ತು ಬೈಕ್ ಕಳ್ಳತನ ಮಾಡಿದ ಆರೋಪಿ ಇಬ್ಬರನ್ನು ಪೊಲೀಸರು ಮಂಗಳವಾರವೇ ಬಂಧಿಸಿ, ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಿರುವುದು ಸ್ಮರಿಸಬಹುದಾಗಿದೆ.