ಡೈಲಿವಾರ್ತೆ: 15/ಮೇ/2026
ಅಭಿವೃದ್ಧಿ ವೈಫಲ್ಯ ಮುಚ್ಚಿಡಲು ಧರ್ಮದ ಕಾರ್ಡ್: ಶಾಸಕ ಭರತ್ ಶೆಟ್ಟಿಗೆ ಎಸ್ಡಿಪಿಐ ಘಟಕದ ಅಧ್ಯಕ್ಷ ಉಸ್ಮಾನ್ ಗುರುಪುರ
ಮಂಗಳೂರು: ಶಾಲೆಗಳು ಇರುವುದು ವಿದ್ಯಾರ್ಥಿಗಳ ಕಲಿಕೆಗೇ ಹೊರತು ರಾಜಕೀಯ ಅಖಾಡಕ್ಕಲ್ಲ. ಹಿಜಾಬ್ ಎಂಬುದು ಸಾಂವಿಧಾನಿಕ ಹಕ್ಕಾಗಿದ್ದರೆ, ಕೇಸರಿ ಶಾಲು ಕೇವಲ ರಾಜಕೀಯ ಸಂಕೇತ. ಇವೆರಡನ್ನೂ ಸಮೀಕರಿಸುವ ಮೂಲಕ ಶಾಸಕ ಭರತ್ ಶೆಟ್ಟಿ ಅವರು ಸಾರ್ವಜನಿಕರ ಹಾದಿ ತಪ್ಪಿಸುತ್ತಿದ್ದಾರೆ ಎಂದು ಎಸ್ಡಿಪಿಐ ಮಂಗಳೂರು ನಗರ ಉತ್ತರ ಘಟಕದ ಅಧ್ಯಕ್ಷ ಉಸ್ಮಾನ್ ಗುರುಪುರ ತೀವ್ರ ವಾಗ್ದಾಳಿ ನಡೆಸಿದ್ದಾರೆ.
ಶೈಕ್ಷಣಿಕ ಕೇಂದ್ರಗಳಲ್ಲಿ ಹಿಜಾಬ್ ವಿಚಾರವಾಗಿ ಶಾಸಕರು ನೀಡಿದ ಹೇಳಿಕೆಯನ್ನು ಕಟುವಾಗಿ ಟೀಕಿಸಿದ ಅವರು, ಕ್ಷೇತ್ರದ ಜ್ವಲಂತ ಸಮಸ್ಯೆಗಳ ಕಡೆಗೆ ಶಾಸಕರ ಗಮನ ಸೆಳೆದರು.
ಸಂವಿಧಾನ ವರ್ಸಸ್ ರಾಜಕೀಯ: ಹಿಜಾಬ್ ಧರಿಸುವುದು ಸಂವಿಧಾನ ನೀಡಿರುವ ಮೂಲಭೂತ ಹಕ್ಕು. ಇದನ್ನು ರಾಜಕೀಯ ಪ್ರೇರಿತ ಕೇಸರಿ ಶಾಲಿನೊಂದಿಗೆ ಹೋಲಿಸುವುದು ತರ್ಕಹೀನ ಎಂದು ಉಸ್ಮಾನ್ ಗುರುಪುರ ಆಕ್ರೋಶ ವ್ಯಕ್ತಪಡಿಸಿದರು.
ಕ್ಷೇತ್ರದಲ್ಲಿ ಸಮರ್ಪಕ ಯುಜಿಡಿ (ಒಳಚರಂಡಿ) ವ್ಯವಸ್ಥೆ ಇಲ್ಲ, ರಸ್ತೆಗಳು ಹದಗೆಟ್ಟಿವೆ, ನಿರುದ್ಯೋಗ ಸಮಸ್ಯೆ ತಾಂಡವವಾಡುತ್ತಿದೆ. ಈ ನೈಜ ಸಮಸ್ಯೆಗಳ ಬಗ್ಗೆ ಮಾತನಾಡದ ಶಾಸಕರು ಕೇವಲ ಮಕ್ಕಳ ಸಮವಸ್ತ್ರದ ಹಿಂದೆ ಬಿದ್ದಿರುವುದು ದುರಂತ ಎಂದು ಅವರು ಟೀಕಿಸಿದರು.
ಸುರತ್ಕಲ್ ಮಾರ್ಕೆಟ್ ದುಸ್ಥಿತಿ: ಸುರತ್ಕಲ್ ಮಾರುಕಟ್ಟೆಯ ಚಾವಣಿ ಸೋರುತ್ತಿರುವುದು ಶಾಸಕರ ಕಣ್ಣಿಗೆ ಕಾಣಿಸುತ್ತಿಲ್ಲವೇ? ಜನರ ಮೂಲಭೂತ ಸೌಕರ್ಯಗಳ ಬಗ್ಗೆ ಮೌನ ವಹಿಸಿರುವ ಶಾಸಕರು, ತಮ್ಮ ಅಧಿಕಾರಾವಧಿಯ ಶೂನ್ಯ ಅಭಿವೃದ್ಧಿಯನ್ನು ಮುಚ್ಚಿಹಾಕಲು ‘ಧರ್ಮದ ಕಾರ್ಡ್’ ಬಳಸುತ್ತಿದ್ದಾರೆ ಎಂದು ಅವರು ನೇರ ಆರೋಪ ಮಾಡಿದರು.
ರಾಜಕಾರಣವನ್ನು ಬದಿಗಿಟ್ಟು ಮಕ್ಕಳ ಶಿಕ್ಷಣಕ್ಕೆ ಆದ್ಯತೆ ನೀಡಿ. ದ್ವೇಷದ ರಾಜಕಾರಣವನ್ನು ನಿಲ್ಲಿಸಿ ಕ್ಷೇತ್ರದ ಸರ್ವತೋಮುಖ ಅಭಿವೃದ್ಧಿಗೆ ಶ್ರಮಿಸುವುದು ಒಬ್ಬ ಜನಪ್ರತಿನಿಧಿಯ ಕರ್ತವ್ಯ ಎಂದು ಉಸ್ಮಾನ್ ಗುರುಪುರ ಅವರು ಶಾಸಕ ಭರತ್ ಶೆಟ್ಟಿ ಅವರಿಗೆ ಕಿವಿಮಾತು ಹೇಳಿದ್ದಾರೆ.
ಈ ವಾಗ್ದಾಳಿಯು ಮಂಗಳೂರು ಉತ್ತರ ವಿಧಾನಸಭಾ ಕ್ಷೇತ್ರದಲ್ಲಿ ರಾಜಕೀಯ ಸಂಚಲನ ಮೂಡಿಸಿದ್ದು, ಅಭಿವೃದ್ಧಿ ಮತ್ತು ಹಕ್ಕುಗಳ ಕುರಿತಾದ ಚರ್ಚೆಯನ್ನು ಮುನ್ನೆಲೆಗೆ ತಂದಿದೆ.