ಡೈಲಿವಾರ್ತೆ: 30/ಜೂ./2026
ಚಲಿಸುವ ರೈಲಿನಿಂದ ವಯೋವೃದ್ಧ ಯಾತ್ರಿಕ ನಿಗೂಢ ನಾಪತ್ತೆ: ಬೈಂದೂರು ಠಾಣೆಯಲ್ಲಿ ಪ್ರಕರಣ ದಾಖಲು
ಬೈಂದೂರು: ಅಜ್ಮೀರ್ ದರ್ಗಾ ಪ್ರವಾಸ ಮುಗಿಸಿ ಕುಟುಂಬದೊಂದಿಗೆ ರೈಲಿನಲ್ಲಿ ಊರಿಗೆ ಮರಳುತ್ತಿದ್ದ ಕೇರಳದ ಕಾಸರಗೋಡು ನಿವಾಸಿ ಮುಸಾ ಯಾನೆ ಅಬುಸಾಲಿ (68) ಎಂಬ ವಯೋವೃದ್ಧರು ಚಲಿಸುವ ರೈಲಿನಿಂದಲೇ ನಿಗೂಢವಾಗಿ ನಾಪತ್ತೆಯಾಗಿದ್ದಾರೆ.
ಜೂನ್ 27ರಂದು ರಾತ್ರಿ 10:00 ಗಂಟೆಗೆ ಕಾರವಾರ ಸಮೀಪ ಮುರುಸಾದ್ ಎಕ್ಸ್ಪ್ರೆಸ್ ರೈಲಿನಲ್ಲಿ ಕುಟುಂಬದವರೊಂದಿಗೆ ಊಟ ಮಾಡಿ ಮಲಗಿದ್ದ ಮುಸಾ ಅವರು, ಮಧ್ಯರಾತ್ರಿ 1:00 ಗಂಟೆಗೆ ರೈಲು ಮಂಗಳೂರು ಸಮೀಪಿಸಿದಾಗ ಸೀಟಿನಲ್ಲಿ ಇರಲಿಲ್ಲ. ನಡೆದಾಡಲು ವಾಕಿಂಗ್ ಸ್ಟಿಕ್ ಬಳಸುತ್ತಿದ್ದ ಇವರು, ರೈಲು ನಿಂತಾಗ ಯಾವುದೋ ನಿಲ್ದಾಣದಲ್ಲಿ ಇಳಿದು ದಾರಿ ತಪ್ಪಿ ನಾಪತ್ತೆಯಾಗಿರಬಹುದು ಎಂದು ಶಂಕಿಸಲಾಗಿದೆ.
ಬೈಂದೂರು ರೈಲ್ವೆ ನಿಲ್ದಾಣದ ವ್ಯಾಪ್ತಿಯಲ್ಲಿ ಇವರು ಕಾಣೆಯಾಗಿರುವ ಸಾಧ್ಯತೆಯಿದ್ದು, ಮಗ ಮುಸ್ತಪಾ ನೀಡಿದ ದೂರಿನ ಮೇರೆಗೆ ಬೈಂದೂರು ಪೊಲೀಸ್ ಠಾಣೆಯಲ್ಲಿ ‘ಗಂಡಸು ಕಾಣೆ’ ಪ್ರಕರಣ ದಾಖಲಾಗಿದ್ದು, ಪೊಲೀಸರು ತನಿಖೆ ಕೈಗೊಂಡಿದ್ದಾರೆ.