ಡೈಲಿವಾರ್ತೆ: 11/ನ./2026
ನಂದಿನಿ ಬೆನ್ನಲ್ಲೇ ಮದರ್ ಡೈರಿ ಹಾಲಿನ ದರದಲ್ಲಿಯೂ ಏರಿಕೆ: ಲೀಟರ್‌ಗೆ ₹4 ಹೆಚ್ಚಳ; ನ.12ರಿಂದ ಹೊಸ ದರ ಜಾರಿ
ನವದೆಹಲಿ: ದೆಹಲಿ-ಎನ್‌ಸಿಆರ್ ಪ್ರದೇಶದ ಗ್ರಾಹಕರಿಗೆ ಹಾಲಿನ ಬೆಲೆ ಏರಿಕೆಯ ಬಿಸಿ ತಟ್ಟಿದೆ. ಪ್ರಮುಖ ಹಾಲು ಉತ್ಪಾದನಾ ಹಾಗೂ ವಿತರಣಾ ಸಂಸ್ಥೆಯಾಗಿರುವ ಮದರ್ ಡೈರಿ ವಿವಿಧ ಮಾದರಿಯ ಹಾಲಿನ ದರವನ್ನು ಪ್ರತಿ ಲೀಟರ್‌ಗೆ ₹2ರಿಂದ ₹4ರವರೆಗೆ ಹೆಚ್ಚಳ ಮಾಡಿದೆ. ಪರಿಷ್ಕೃತ ದರಗಳು ನವೆಂಬರ್ 12ರಿಂದ ಜಾರಿಗೆ ಬರಲಿದ್ದು, ನಿತ್ಯ ಹಾಲು ಖರೀದಿಸುವ ಗ್ರಾಹಕರಿಗೆ ಹೆಚ್ಚುವರಿ ಆರ್ಥಿಕ ಹೊರೆ ಬೀಳಲಿದೆ.
ಮದರ್ ಡೈರಿ ಪ್ರಕಟಿಸಿರುವ ಪರಿಷ್ಕೃತ ದರದಂತೆ, ಫುಲ್ ಕ್ರೀಮ್ ಹಾಲಿನ ಬೆಲೆ ಪ್ರತಿ ಲೀಟರ್‌ಗೆ ₹72ರಿಂದ ₹76ಕ್ಕೆ ಏರಿಕೆಯಾಗಿದೆ. ಪ್ಯಾಕೆಟ್ ಟೋನ್ಡ್ ಹಾಲಿನ ದರ ₹60ರಿಂದ ₹62ಕ್ಕೆ ಹಾಗೂ ಡಬಲ್ ಟೋನ್ಡ್ ಹಾಲಿನ ದರ ₹54ರಿಂದ ₹56ಕ್ಕೆ ಹೆಚ್ಚಿಸಲಾಗಿದೆ. ಹಸುವಿನ ಹಾಲಿನ ಬೆಲೆ ₹62ರಿಂದ ₹65ಕ್ಕೆ ಏರಿಕೆಯಾಗಿದ್ದು, ಮುಕ್ತ ವಿತರಣೆಯ ಟೋನ್ಡ್ ಹಾಲಿನ ದರ ಪ್ರತಿ ಲೀಟರ್‌ಗೆ ₹58ರಿಂದ ₹60ಕ್ಕೆ ಪರಿಷ್ಕೃತಗೊಂಡಿದೆ.
ರೈತರಿಂದ ಹಾಲು ಸಂಗ್ರಹಿಸುವ ವೆಚ್ಚದಲ್ಲಿ ಗಣನೀಯ ಏರಿಕೆಯಾಗಿರುವುದೇ ದರ ಹೆಚ್ಚಳಕ್ಕೆ ಪ್ರಮುಖ ಕಾರಣ ಎಂದು ಸಂಸ್ಥೆಯ ಮೂಲಗಳು ತಿಳಿಸಿವೆ. ಹಾಲು ಖರೀದಿ ವೆಚ್ಚ ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ ಉಂಟಾಗಿರುವ ಹೆಚ್ಚುವರಿ ಹೊರೆಯ ಒಂದು ಭಾಗವನ್ನು ಗ್ರಾಹಕರಿಗೆ ವರ್ಗಾಯಿಸಲು ಮದರ್ ಡೈರಿ ನಿರ್ಧರಿಸಿದೆ. ಸಂಸ್ಥೆಯ ಒಟ್ಟು ಹಾಲು ಮಾರಾಟದ ಆದಾಯದಲ್ಲಿ ಶೇ.75ರಿಂದ 80ರಷ್ಟು ಮೊತ್ತವನ್ನು ಹಾಲು ಪೂರೈಕೆ ಮಾಡುವ ರೈತರಿಗೆ ಪಾವತಿಸಲಾಗುತ್ತಿದೆ ಎಂದು ವರದಿಯಾಗಿದೆ.
ದಿನಕ್ಕೆ 35 ಲಕ್ಷ ಲೀಟರ್ ಹಾಲು ಮಾರಾಟ:
ಮದರ್ ಡೈರಿ ದೆಹಲಿ-ಎನ್‌ಸಿಆರ್ ಪ್ರದೇಶದಲ್ಲಿ ಪ್ರತಿದಿನ ಸರಿಸುಮಾರು 35 ಲಕ್ಷ ಲೀಟರ್ ಹಾಲು ಮಾರಾಟ ಮಾಡುತ್ತಿದೆ. ತನ್ನದೇ ಮಾರಾಟ ಮಳಿಗೆಗಳು, ಸಾಮಾನ್ಯ ಚಿಲ್ಲರೆ ವ್ಯಾಪಾರ ಮಳಿಗೆಗಳು ಹಾಗೂ ಆನ್‌ಲೈನ್ ವಾಣಿಜ್ಯ ವೇದಿಕೆಗಳ ಮೂಲಕ ಗ್ರಾಹಕರಿಗೆ ಹಾಲು ಪೂರೈಸುತ್ತಿದೆ. ದೇಶಾದ್ಯಂತ ಸಂಸ್ಥೆಯ ದೈನಂದಿನ ಹಾಲಿನ ಮಾರಾಟ ಪ್ರಮಾಣ 50 ಲಕ್ಷ ಲೀಟರ್‌ಗಿಂತಲೂ ಅಧಿಕವಾಗಿದೆ.
ಇದಕ್ಕೂ ಮೊದಲು 2026ರ ಮೇ 14ರಂದು ಮದರ್ ಡೈರಿ ಹಾಲಿನ ದರವನ್ನು ಪರಿಷ್ಕರಿಸಿತ್ತು. ಅದಕ್ಕೂ ಮುನ್ನ 2025ರ ಏಪ್ರಿಲ್‌ನಲ್ಲಿ ಬೆಲೆ ಏರಿಕೆ ಮಾಡಲಾಗಿತ್ತು. ಇದೀಗ ಸುಮಾರು ಆರು ತಿಂಗಳ ಅಂತರದಲ್ಲಿ ಮತ್ತೊಮ್ಮೆ ದರ ಹೆಚ್ಚಳದ ನಿರ್ಧಾರ ಕೈಗೊಂಡಿರುವುದು ಗ್ರಾಹಕರ ದೈನಂದಿನ ಖರ್ಚಿನ ಮೇಲೆ ಪರಿಣಾಮ ಬೀರುವ ನಿರೀಕ್ಷೆಯಿದೆ.
