ಡೈಲಿ ವಾರ್ತೆ:11 ಜುಲೈ 2023
ಮಣಿಪಾಲ:ಅಡ್ಡಾದಿಡ್ಡಿ ಚಲಿಸಿದ ಕಾರು – ಅಪರಿಚಿತರಿಂದ ಸರಣಿ ಅಪಘಾತವೆಸಗಿ ಪರಾರಿ.!
ಉಡುಪಿ : ಕಾರನ್ನು ಅಡ್ಡಾದಿಡ್ಡಿ ಚಲಾಯಿಸಿ ಹಲವು ವಾಹನಗಳಿಗೆ ಡಿಕ್ಕಿ ಹೊಡೆದು ಪೊಲೀಸರನ್ನು ಕಂಡಾಗ ವಾಹನ ಬಿಟ್ಟು ಮೂವರು ಕಾಡಿನೊಳಗೆ ಓಡಿಹೋದ ಘಟನೆಯೊಂದು ನಿನ್ನೆ ಮಣಿಪಾಲದಲ್ಲಿ ಸಂಭವಿಸಿದೆ.
ಸಂಜೆ ಪರ್ಕಳ ಕಡೆಯಿಂದ ಮಣಿಪಾಲದತ್ತ ಮಾರುತಿ ಸ್ವಿಫ್ಟ್ ಕಾರೊಂದು ವಿಪರೀತ ವೇಗದಿಂದ ಹೋಗುತ್ತಿತ್ತು. ಕಾರಿನಲ್ಲಿ ಮೂವರು ಇದ್ದರು ಎನ್ನಲಾಗಿದೆ. ಈ ಕಾರು ಕೆಎಂಸಿ ಆಸ್ಪತ್ರೆ ಹತ್ತಿರ ನಿಂತಿದ್ದ ಬಸ್ಸಿಗೆ ಹಿಂದಿನಿಂದ ಹೋಗಿ ಡಿಕ್ಕಿ ಹೊಡೆದು ಬಳಿಕ ರಿವರ್ಸ್ ತೆಗೆಯುವಾಗ ಹಿಂದೆ ಇದ್ದ ದ್ವಿಚಕ್ರ ವಾಹನಕ್ಕೆ ಡಿಕ್ಕಿ ಹೊಡೆದಿದೆ. ದ್ವಿಚಕ್ರ ಸವಾರ ರಸ್ತೆಗೆ ಬಿದ್ದು ಗಾಯಗೊಂಡಿದ್ದಾರೆ. ಪರ್ಕಳದಿಂದ ಬರುವಾಗಲೇ ಈ ಕಾರು ವಾಹನಗಳನ್ನು ಸವರುತ್ತಾ ಬಂದಿದ್ದು, ಆತಂಕ ಮೂಡಿಸಿತ್ತು. ಪೊಲೀಸರು ಕಾರನ್ನು ಬೆನ್ನಟ್ಟಿದಾಗ ವಾಪಸು ಪರ್ಕಳ ಕಡೆ ತಿರುಗಿಸಿ ಪಲಾಯನ ಮಾಡಿದ್ದಾರೆ. ಪರ್ಕಳ ಸಮೀಪ ಕಾರು ನಿಲ್ಲಿಸಿ ಹತ್ತಿರದ ಕಾಡಿಗೆ ನುಗ್ಗಿ ಪಲಾಯನ ಮಾಡಿದ್ದಾರೆ. ಕಾರಿನ ದಾಖಲೆಪತ್ರಗಳು ಕೊಡವೂರಿನ ವ್ಯಕ್ತಿಯೊಬ್ಬರ ಹೆಸರಿನಲ್ಲಿದೆ. ಕಾರಿನಲ್ಲಿದ್ದವರು ಗಾಂಜಾ ಸೇವಿಸಿ ಅಮಲಿನಲ್ಲಿ ಈ ಕೃತ್ಯ ಎಸಗಿದ್ದಾರೆ ಎನ್ನಲಾಗಿದೆ. ಅಮಲು ಪದಾರ್ಥ ಸೇವಿಸಿ ಸುಳಿವು ಕಾರಿನಲ್ಲಿ ಸಿಕ್ಕಿದೆ.