ಡೈಲಿ ವಾರ್ತೆ:13 ಆಗಸ್ಟ್ 2023
ಸಕ್ಕರೆ ಬದಲು ಬೆಲ್ಲ ತಿನ್ನಬಹುದಾ ಅಥವಾ ಬೇಡ್ವಾ.? ಇಲ್ಲಿದೆ ಮಾಹಿತಿ
ಮಧುಮೇಹ ಸಮಸ್ಯೆಯಿರುವವರು ಎಂದಿಗೂ ಸಹ ತಮ್ಮ ಆಹಾರ ಪದ್ಧತಿಯಲ್ಲಿ ಸಕ್ಕರೆ ಪದಾರ್ಥಗಳನ್ನು ಆದಷ್ಟು ಕಡಿಮೆ ಮಾಡಿಕೊಳ್ಳಬೇಕು ಅಥವಾ ಮಧುಮೇಹ ಸಮಸ್ಯೆ ನಿಯಂತ್ರಣಕ್ಕೆ ಸಿಗದೇ ಇರುವವರು ಸಕ್ಕರೆ ಅಂಶ ಸೇವನೆಯನ್ನು ಬಿಟ್ಟುಬಿಡಬೇಕು ಎಂದು ಹೇಳುತ್ತಾರೆ.
ಆದರೆ ತಮ್ಮ ದೇಹದ ಸಕ್ಕರೆ ಮಟ್ಟವನ್ನು ನಿಯಂತ್ರಣ ಮಾಡಿಕೊಳ್ಳಲು ಮಧುಮೇಹ ಸಮಸ್ಯೆ ಇರುವವರು ಸಕ್ಕರೆ ಬದಲು ಬೆಲ್ಲ ತಿಂದರೆ ಒಳ್ಳೆಯದು ಎಂಬ ಮಾತಿದೆ.
ಇದು ನಿಜಕ್ಕೂ ಎಷ್ಟು ಸತ್ಯ ಇದರಿಂದ ಬೇರೆ ಯಾವುದಾದರೂ ಆರೋಗ್ಯದ ಮೇಲೆ ಅಡ್ಡ ಪರಿಣಾಮಗಳು ಉಂಟಾಗುತ್ತವೆ ಅಥವಾ ಇಲ್ಲ ಎಂಬುದರ ಕುರಿತು ತಿಳಿಯೋಣ ಬನ್ನಿ.
ಬೆಲ್ಲ ಮತ್ತು ಸಕ್ಕರೆ ಎರಡು ಒಂದೇ :
ಬೆಲ್ಲ ಮತ್ತು ಸಕ್ಕರೆಯನ್ನು ತಯಾರು ಮಾಡುವುದು ಕಬ್ಬಿನಿಂದ. ಹಾಗೆಂದ ಮೇಲೆ ಒಂದೇ ಮೂಲದಿಂದ ಬಂದ ಇವೆರಡು ಕೂಡ ಒಂದೇ ಅಲ್ಲವೇ? ಸಕ್ಕರೆ ಹೋಲಿಕೆ ಮಾಡಿದ್ರೆ ಬೆಲ್ಲದಲ್ಲಿ ಅಪಾರ ಪ್ರಮಾಣದ ಪೌಷ್ಟಿಕ ಸತ್ವಗಳು ಸಿಗುತ್ತವೆ. ಇದು ಮಧುಮೇಹ ಹೊಂದಿರುವ ಜನರಿಗೆ ತುಂಬಾ ಸಹಕಾರಿ ಎಂದೆಲ್ಲಾ ಹೇಳುತ್ತಾರೆ.
ಆದರೆ ಸಕ್ಕರೆ ತಿಂದಾಗ ಮಾತ್ರ ದೇಹದಲ್ಲಿ ರಕ್ತದ ಸಕ್ಕರೆ ಪ್ರಮಾಣ ಹೆಚ್ಚಾಗುತ್ತದೆ. ಬೆಲ್ಲ ತಿಂದಾಗ ಆಗುವುದಿಲ್ಲ ಅಂತ ಅಂದುಕೊಳ್ಳುವುದು ತಪ್ಪು. ಮಧುಮೇಹ ಹೊಂದಿದ ಜನರಿಗೆ ಇವೆರಡೂ ಸಹ ಡೇಂಜರ್.
ಬೆಲ್ಲ ಏಕೆ ಕೆಟ್ಟದ್ದು..?
ಸಕ್ಕರೆಯನ್ನು ಹೆಚ್ಚು ಸಂಸ್ಕರಿಸುವ ಕಾರಣದಿಂದ ಸಾಮಾನ್ಯವಾಗಿ ಅದರಲ್ಲಿರುವ ಪೌಷ್ಟಿಕ ಸತ್ವಗಳು ನಾಶವಾಗುತ್ತವೆ. ಆದರೆ ಬೆಲ್ಲದಲ್ಲಿ ಹಾಗಾಗುವುದಿಲ್ಲ. ಇದರಲ್ಲಿ ವೈಜ್ಞಾನಿಕವಾಗಿ ಮೆಗ್ನಿಷಿಯಂ, ಕ್ಯಾಲ್ಸಿಯಂ, ಜಿಂಕ್, ಕಬ್ಬಿಣ, ಪೊಟಾಶಿಯಂ, ಫಾಸ್ಪರಸ್, ತಾಮ್ರ ಇತ್ಯಾದಿಗಳು ಸಾಕಷ್ಟು ಅಡಗಿವೆ.
ಸಕ್ಕರೆಗೆ ಹೋಲಿಸಿದರೆ ಬೆಲ್ಲ ಇಂತಹ ಪೌಷ್ಟಿಕ ಸತ್ವಗಳಲ್ಲಿ ಪರವಾಗಿಲ್ಲ ಎನ್ನಬಹುದು. ಆದರೆ ಗ್ಲೈಸೆಮಿಕ್
ಸೂಚ್ಯಂಕದ ವಿಚಾರಕ್ಕೆ ಬಂದರೆ ಬೆಲ್ಲ ಮತ್ತು ಸಕ್ಕರೆಯಲ್ಲಿ ಅಧಿಕ ಗ್ಲೈಸೆಮಿಕ್ ಸೂಚ್ಯಂಕ ಕಂಡುಬರುತ್ತದೆ. ಇದು ದೇಹ ಸೇರಿದಾಗ ಸಾಧಾರಣವಾಗಿ ರಕ್ತದಲ್ಲಿನ ಸಕ್ಕರೆ ಮಟ್ಟ ಹೆಚ್ಚಾಗುವುದು ಗ್ಯಾರಂಟಿ. ಬೆಲ್ಲದಲ್ಲಿ ಸುಕ್ರೋಸ್ ಅಂಶ ಹೆಚ್ಚಾಗಿರುತ್ತದೆ ಮತ್ತು ಸಕ್ಕರೆಯ ಸಂಯುಕ್ತ ಹೆಚ್ಚಿರುವುದರಿಂದ ಇದು ರಕ್ತದಲ್ಲಿ ಸಕ್ಕರೆ ಪ್ರಮಾಣ ಹೆಚ್ಚಾಗುವಂತೆ ಮಾಡುತ್ತದೆ.
ಮಧುಮೇಹಿಗಳು ಆಗಾಗ ಬೆಲ್ಲ ಸೇವಿಸಬಹುದೇ.?
ಮೊದಲೇ ಹೇಳಿದಂತೆ ಬೆಲ್ಲ ಮತ್ತು ಸಕ್ಕರೆ ಎರಡು ಒಂದೇ ಆಗಿರುವುದರಿಂದ ಮಧುಮೇಹ ಸಮಸ್ಯೆ ಇರುವವರು ಎರಡರ ಬಗ್ಗೆಯೂ ಎಚ್ಚರಿಕೆ ವಹಿಸಬೇಕು.
ಬೆಲ್ಲ ಜಾಸ್ತಿ ಬಳಸುವುದು ಒಳ್ಳೆಯದೇ.?
ಮನೆಯಲ್ಲಿ ಮೊದಲೇ ಯಾವುದಾದರೂ ಕಾರ್ಬೋಹೈಡ್ರೆಟ್ ಅಂಶ ಹೊಂದಿದ ಆಹಾರ ಪದಾರ್ಥಗಳನ್ನು ಸೇವನೆ ಮಾಡಿದ ಸಂದರ್ಭದಲ್ಲಿ ಸಕ್ಕರೆ ಮತ್ತು ಬೆಲ್ಲ ತಿನ್ನುವ ಬಗ್ಗೆ ಆಲೋಚನೆ ಮಾಡಬೇಕು.
ಕೇವಲ ಸಣ್ಣ ಪ್ರಮಾಣದಲ್ಲಿ ಮಾತ್ರ ಬೆಲ್ಲವನ್ನು ಈ ಸಂದರ್ಭದಲ್ಲಿ ಸೇವನೆ ಮಾಡುವುದರಿಂದ ಆರೋಗ್ಯಕ್ಕೆ ಯಾವುದೇ ಹಾನಿ ಅಥವಾ ಅಡ್ಡ ಪರಿಣಾಮ ಇರುವುದಿಲ್ಲ.
Disclaimer : ಈ ಲೇಖನವು ಅಂತರ್ಜಾಲದಲ್ಲಿ ಲಭ್ಯವಿರುವ ವರದಿಗಳು, ಮಾಹಿತಿಯನ್ನು ಆಧರಿಸಿದೆ ಡೈಲಿವಾರ್ತೆ ನ್ಯೂಸ್ ಗೂ ಇದಕ್ಕೂ ಸಂಬಂಧವಿಲ್ಲ ಮತ್ತು ಇದಕ್ಕೆ ಜವಾಬ್ದಾರಿಯಲ್ಲ.