ಡೈಲಿ ವಾರ್ತೆ: ಫೆ./07/2026
20 ರೂ. ಲಂಚ ಪ್ರಕರಣದಲ್ಲಿ 30 ವರ್ಷಗಳ ಹೋರಾಟದ ಬಳಿಕ ನಿರಪರಾಧಿ: ನ್ಯಾಯ ಸಿಕ್ಕ ಮರುದಿನವೇ ಪೊಲೀಸ್ ಕಾನ್ಸ್ಟೆಬಲ್ ಸಾವು
ಗಾಂಧೀನಗರ, ಫೆಬ್ರವರಿ 07: ಗುಜರಾತ್ನಲ್ಲಿ ಕೇವಲ 20 ರೂಪಾಯಿ ಲಂಚ ಪಡೆದ ಆರೋಪದಡಿ 30 ವರ್ಷಗಳ ಕಾಲ ಅಪರಾಧಿಯಂತೆ ಬದುಕಬೇಕಾದ ಪೊಲೀಸ್ ಕಾನ್ಸ್ಟೆಬಲ್, ನ್ಯಾಯ ದೊರೆತ ಮರುದಿನವೇ ವಿಧಿವಶರಾಗಿರುವ ಘಟನೆ ರಾಜ್ಯದಾದ್ಯಂತ ತೀವ್ರ ಸಂವೇದನೆಯನ್ನುಂಟು ಮಾಡಿದೆ.
ಅಹಮದಾಬಾದ್ನಲ್ಲಿ ನಿಯೋಜಿತರಾಗಿದ್ದ ಪೊಲೀಸ್ ಕಾನ್ಸ್ಟೆಬಲ್ ಬಾಬುಭಾಯಿ ಪ್ರಜಾಪತಿ ಅವರ ಮೇಲೆ ಭ್ರಷ್ಟಾಚಾರ ತಡೆ ಕಾಯ್ದೆಯಡಿ 20 ರೂಪಾಯಿ ಲಂಚ ಪಡೆದ ಆರೋಪ ದಾಖಲಾಗಿತ್ತು.
ಈ ಸಂಬಂಧ 1997ರಲ್ಲಿ ಸೆಷನ್ಸ್ ನ್ಯಾಯಾಲಯದಲ್ಲಿ ಆರೋಪಪಟ್ಟಿ ಸಲ್ಲಿಸಲಾಗಿದ್ದು, 2002ರಲ್ಲಿ ಆರೋಪಗಳನ್ನು ರೂಪಿಸಲಾಗಿತ್ತು. 2003ರಲ್ಲಿ ಸಾಕ್ಷಿಗಳ ವಿಚಾರಣೆ ಪ್ರಾರಂಭಗೊಂಡಿದ್ದು, 2004ರಲ್ಲಿ ಸೆಷನ್ಸ್ ನ್ಯಾಯಾಲಯವು ಪ್ರಜಾಪತಿಗೆ ನಾಲ್ಕು ವರ್ಷಗಳ ಜೈಲು ಶಿಕ್ಷೆ ಹಾಗೂ 3,000 ರೂ. ದಂಡ ವಿಧಿಸಿತ್ತು.
ಈ ತೀರ್ಪನ್ನು ಪ್ರಶ್ನಿಸಿ ಪ್ರಜಾಪತಿ ಗುಜರಾತ್ ಹೈಕೋರ್ಟ್ಗೆ ಮೇಲ್ಮನವಿ ಸಲ್ಲಿಸಿದ್ದರು. ಆದರೆ ನ್ಯಾಯ ಸಿಗಲು ಅವರಿಗೆ 22 ವರ್ಷಗಳ ಕಾಲ ಕಾಯಬೇಕಾಯಿತು. ಕೊನೆಗೂ ಈ ವರ್ಷ ಫೆಬ್ರವರಿ 4 ರಂದು, ಗುಜರಾತ್ ಹೈಕೋರ್ಟ್ ಪ್ರಜಾಪತಿಯನ್ನು ಸಂಪೂರ್ಣವಾಗಿ ನಿರಪರಾಧಿ ಎಂದು ಘೋಷಿಸಿತು.
ತೀರ್ಪಿನಲ್ಲಿ, ಸಾಕ್ಷಿಗಳ ಹೇಳಿಕೆಗಳಲ್ಲಿ ಗಂಭೀರ ವಿರೋಧಾಭಾಸಗಳಿದ್ದು, ಆರೋಪಗಳನ್ನು ಸಾಬೀತುಪಡಿಸುವಲ್ಲಿ ಪ್ರಾಸಿಕ್ಯೂಷನ್ ಸಂಪೂರ್ಣವಾಗಿ ವಿಫಲವಾಗಿದೆ ಎಂದು ನ್ಯಾಯಾಲಯ ಸ್ಪಷ್ಟವಾಗಿ ಹೇಳಿದೆ. ಪ್ರಜಾಪತಿ ಪರ ವಾದ ಮಂಡಿಸಿದ ವಕೀಲ ನಿತಿನ್ ಗಾಂಧಿ ಅವರು, ಇಡೀ ಪ್ರಕರಣವೇ ಅನುಮಾನಗಳಿಂದ ಕೂಡಿದ್ದು, ಆರೋಪ ಸಾಬೀತಾಗುವುದಿಲ್ಲ ಎಂದು ವಾದಿಸಿದ್ದರು.
ನ್ಯಾಯಾಲಯದ ತೀರ್ಪಿನ ಬಳಿಕ, ಪ್ರಜಾಪತಿ ತಮ್ಮ ವಕೀಲರ ಕಚೇರಿಯಲ್ಲಿ ಮಾತನಾಡುತ್ತಾ,
“ನನ್ನ ಜೀವನದ ಮೇಲೆ ಅಂಟಿದ್ದ ಕಳಂಕ ಇಂದು ಹೋಗಿದೆ. ಈಗ ದೇವರು ನನ್ನನ್ನು ಕರೆದುಕೊಂಡು ಹೋದರೂ ನನಗೆ ಯಾವುದೇ ದುಃಖವಿಲ್ಲ” ಎಂದು ಹೃದಯಸ್ಪರ್ಶಿಯಾಗಿ ಹೇಳಿದ್ದರು.
ನ್ಯಾಯ ಸಿಕ್ಕ ಸಂತಸದಿಂದ ಮನೆಗೆ ಮರಳಿದ್ದ ಪ್ರಜಾಪತಿ, ಮರುದಿನವೇ ಅಕಾಲಿಕವಾಗಿ ನಿಧನರಾದರು. ಅವರ ನಿಧನವು ನ್ಯಾಯಾಂಗ ಪ್ರಕ್ರಿಯೆಯ ವಿಳಂಬ, ಒಬ್ಬ ಸಾಮಾನ್ಯ ವ್ಯಕ್ತಿಯ ಬದುಕಿನ ಮೇಲೆ ಬೀರುವ ಪರಿಣಾಮ ಹಾಗೂ ‘ತಡವಾದ ನ್ಯಾಯವೇ ಅನ್ಯಾಯ’ ಎಂಬ ಕಟು ಸತ್ಯವನ್ನು ಮತ್ತೊಮ್ಮೆ ಸಮಾಜದ ಮುಂದೆ ತೆರೆದಿಟ್ಟಿದೆ.