ಡೈಲಿವಾರ್ತೆ: 11/ಮೇ/2026
ಕುವೆಂಪು ವಿವಿ ಪದವಿ ಪ್ರದಾನ: ಅಂಗವೈಕಲ್ಯ ಮೆಟ್ಟಿ ನಿಂತು ಮೈಕ್ರೋಬಯಾಲಜಿಯಲ್ಲಿ ಚಿನ್ನದ ಪದಕ ಗೆದ್ದ ಬಳ್ಕೂರು ಪ್ರತಿಭೆ ರೂಪಾ
ಕುಂದಾಪುರ: ದೃಢ ಸಂಕಲ್ಪ ಹಾಗೂ ಸತತ ಪರಿಶ್ರಮವಿದ್ದರೆ ದೈಹಿಕ ಸವಾಲುಗಳು ಸಾಧನೆಗೆ ಅಡ್ಡಿಯಾಗಲಾರವು ಎಂಬುದನ್ನು ಕುಂದಾಪುರದ ಬಳ್ಕೂರು ಗ್ರಾಮದ ರೂಪಾ ಪೂಜಾರ್ತಿ ಸಾಬೀತುಪಡಿಸಿದ್ದಾರೆ.
ಶಿವಮೊಗ್ಗದ ಕುವೆಂಪು ವಿಶ್ವವಿದ್ಯಾಲಯವು ಇತ್ತೀಚೆಗೆ ನಡೆಸಿದ ಎಂ.ಎಸ್ಸಿ (ಮೈಕ್ರೋಬಯಾಲಜಿ) ಸ್ನಾತಕೋತ್ತರ ಪದವಿ ಪರೀಕ್ಷೆಯಲ್ಲಿ ರೂಪಾ ಅವರು ಪ್ರಥಮ ರ್ಯಾಂಕ್ ಪಡೆಯುವುದರ ಜೊತೆಗೆ ಬಂಗಾರದ ಪದಕ (Gold Medal) ಮುಡಿಗೇರಿಸಿಕೊಂಡು ಜಿಲ್ಲೆಯ ಕೀರ್ತಿ ಹೆಚ್ಚಿಸಿದ್ದಾರೆ.
ದೈಹಿಕ ಸವಾಲು ಮೆಟ್ಟಿ ನಿಂತ ಅಪ್ರತಿಮ ಸಾಧನೆ:
ಬಸ್ರೂರು ಗ್ರಾಮ ಪಂಚಾಯತ್ ವ್ಯಾಪ್ತಿಯ ಬಳ್ಕೂರು ನಿವಾಸಿಗಳಾದ ಶ್ರೀ ಗೋಪಾಲ ಪೂಜಾರಿ ಹಾಗೂ ಶ್ರೀಮತಿ ಯಶೋಧ ಪೂಜಾರ್ತಿ ದಂಪತಿಯ ಪುತ್ರಿಯಾಗಿರುವ ರೂಪಾ ಅವರು ಹುಟ್ಟಿನಿಂದಲೇ ವಿಕಲಚೇತನರು. ಹತ್ತು ಬೆರಳುಗಳ ಬೆಳವಣಿಗೆಯಿಲ್ಲದ ಮುಂಡು ಕೈ ಬೆರಳುಗಳಲ್ಲೇ ಅಕ್ಷರಗಳನ್ನು ಅಭ್ಯಾಸ ಮಾಡಿ, ಇಂದು ವಿಜ್ಞಾನದಂತಹ ಕಠಿಣ ವಿಷಯದಲ್ಲಿ ಈ ಅತ್ಯುನ್ನತ ಸಾಧನೆ ಮಾಡಿರುವುದು ರಾಜ್ಯಕ್ಕೇ ಮಾದರಿಯಾಗಿದೆ.
ಶೈಕ್ಷಣಿಕ ಹಾದಿ:ಗ್ರಾಮೀಣ ಭಾಗದ ಪ್ರತಿಭೆಯಾಗಿರುವ ರೂಪಾ ಅವರ ಶೈಕ್ಷಣಿಕ ಸಾಧನೆಯ ಹಾದಿಯು ಪ್ರಾಥಮಿಕ/ಪ್ರೌಢ ಶಿಕ್ಷಣ: ಸರ್ಕಾರಿ ಪ್ರೌಢಶಾಲೆ, ಬಸ್ರೂರು. ಪದವಿ ಪೂರ್ವ ಶಿಕ್ಷಣ: ಸರ್ಕಾರಿ ಪದವಿಪೂರ್ವ ಕಾಲೇಜು (ಬೋರ್ಡ್ ಹೈಸ್ಕೂಲ್), ಕುಂದಾಪುರ. ಪದವಿ: ಭಂಡಾರ್ಕರ್ಸ್ ಕಾಲೇಜು, ಕುಂದಾಪುರದಲ್ಲಿ ಮುಗಿಸಿ ಸೂಕ್ಷ್ಮಜೀವವಿಜ್ಞಾನದಂತಹ (Microbiology) ಪ್ರಾಯೋಗಿಕ ಮತ್ತು ಕಠಿಣ ವಿಷಯದಲ್ಲಿ ಇವರು ತೋರಿದ ಶ್ರದ್ಧೆ ಹಾಗೂ ಆಸಕ್ತಿ ಶ್ಲಾಘನೀಯ.
ಸಾಮಾನ್ಯ ಕುಟುಂಬದ ಅಸಾಮಾನ್ಯ ಸಾಧಕಿ:
ರೂಪಾ ಅವರ ತಂದೆ ಗೋಪಾಲ ಪೂಜಾರಿ ಅವರು ಹಾಗೂ ತಾಯಿ ಯಶೋಧ ಅವರು ಟೈಲ್ಸ್ ಫ್ಯಾಕ್ಟರಿಯೊಂದರಲ್ಲಿ ಕಾರ್ಮಿಕರಾಗಿ ದುಡಿಯುತ್ತಿದ್ದಾರೆ. ಆರ್ಥಿಕ ಮುಗ್ಗಟ್ಟು ಹಾಗೂ ದೈಹಿಕ ಸವಾಲುಗಳ ನಡುವೆಯೂ ಮಗಳ ಸಾಧನೆಗೆ ಪೋಷಕರು ನೀಡಿದ ಬೆಂಬಲ ಅಪಾರ. ಈ ದಂಪತಿಯ ಇಬ್ಬರು ಪುತ್ರಿಯರಲ್ಲಿ ರೂಪಾ ಹಿರಿಯವಳು.
ಗ್ರಾಮಸ್ಥರ ಹರ್ಷ ಮತ್ತು ಅಭಿನಂದನೆ:ಬಳ್ಕೂರುನಂತಹ ಪುಟ್ಟ ಗ್ರಾಮದ ಪ್ರತಿಭೆ ವಿಶ್ವವಿದ್ಯಾಲಯ ಮಟ್ಟದಲ್ಲಿ ಚಿನ್ನದ ಪದಕ ವಿಜೇತರಾಗಿರುವುದು ಗ್ರಾಮಸ್ಥರಲ್ಲಿ ಹೆಮ್ಮೆ ತಂದಿದೆ.ರೂಪಾ ಅವರ ಸಾಧನೆ ಇಡೀ ಊರಿಗೆ ಸಂದ ಗೌರವ ಎಂದು ಹಿರಿಯರು ಹರ್ಷ ವ್ಯಕ್ತಪಡಿಸಿದ್ದಾರೆ. ದೃಢ ಸಂಕಲ್ಪದಿಂದ ಅಸಾಧ್ಯವಾದುದನ್ನು ಸಾಧಿಸಿ ತೋರಿಸಿದ ರೂಪಾ ಪೂಜಾರ್ತಿ ಅವರಿಗೆ ಹಾಗೂ ಅವರ ಪೋಷಕರಿಗೆ ಸಾಮಾಜಿಕ ಜಾಲತಾಣ ಹಾಗೂ ಸಾರ್ವಜನಿಕ ವಲಯದಲ್ಲಿ ಅಭಿನಂದನೆಗಳ ಮಹಾಪೂರವೇ ಹರಿದು ಬರುತ್ತಿದೆ.