ಡೈಲಿವಾರ್ತೆ:11/ಸೆ./2026
ಶಾಸ್ತ್ರದ ಮಾತು ನಂಬಿ ಗ್ರಾಮ ತೊರೆದ 13 ಗೌಳಿ ಕುಟುಂಬ – ಜಿಲ್ಲಾಧಿಕಾರಿಯಿಂದ ತನಿಖೆ
ಕಾರವಾರ: ನಿರಂತರ ಸಾವುಗಳ ಭೀತಿಯಿಂದಾಗಿ ಶಾಸ್ತ್ರದಲ್ಲಿ ಹೇಳಿದ ಮಾತುಗಳನ್ನು ನಂಬಿ ಗೌಳಿ ಸಮುದಾಯದ ಕುಟುಂಬಗಳು ತಮ್ಮ ಮೂರು ತಲೆಮಾರುಗಳ ಬದುಕಿನ ನೆಲೆಯನ್ನೇ ತೊರೆಯುತ್ತಿರುವ ಆತಂಕಕಾರಿ ಘಟನೆ ಉತ್ತರ ಕನ್ನಡ ಜಿಲ್ಲೆಯ ಜೋಯಿಡಾ ತಾಲೂಕಿನ ಬಾಡಗುಂದ ಗ್ರಾಮದಲ್ಲಿ ನಡೆದಿದೆ.
ಬಾಡಗುಂದದಲ್ಲಿ ಒಟ್ಟು 18 ಗೌಳಿ ಕುಟುಂಬಗಳ 103 ಮಂದಿ ವಾಸಿಸುತ್ತಿದ್ದರು. ಆದರೆ, ಇದೀಗ 13 ಕುಟುಂಬಗಳ 74 ಮಂದಿ ಗ್ರಾಮ ತೊರೆದು ಬೇರೆಡೆಗೆ ವಲಸೆ ಹೋಗಿದ್ದಾರೆ. ಉಳಿದ ಕುಟುಂಬಗಳೂ ಊರು ಬಿಡಲು ಸಿದ್ಧತೆ ನಡೆಸುತ್ತಿದ್ದು, ಗ್ರಾಮದಲ್ಲಿ ಆತಂಕದ ವಾತಾವರಣ ಮುಂದುವರಿದಿದೆ.
ನಿರಂತರ ಸಾವುಗಳಿಂದ ಬೆಚ್ಚಿದ ಗ್ರಾಮ
ತಲೆತಲಾಂತರಗಳಿಂದ ಗೌಳಿ ಸಮುದಾಯದವರು ವಾಸಿಸುತ್ತಿರುವ ಬಾಡಗುಂದದಲ್ಲಿ ಹೈನುಗಾರಿಕೆ ಪ್ರಮುಖ ಜೀವನಾಧಾರವಾಗಿದೆ. ಕೃಷಿ ಹಾಗೂ ಹೈನುಗಾರಿಕೆಯನ್ನೇ ನಂಬಿಕೊಂಡು ಬದುಕು ಕಟ್ಟಿಕೊಂಡಿದ್ದ ಕುಟುಂಬಗಳು ಇದೀಗ ಮನೆ, ಜಮೀನು ಹಾಗೂ ಜೀವನೋಪಾಯವನ್ನು ತೊರೆದು ವಲಸೆ ಹೋಗುತ್ತಿರುವುದು ಗಂಭೀರ ಚರ್ಚೆಗೆ ಕಾರಣವಾಗಿದೆ.
ಕಳೆದ ಕೆಲವು ವರ್ಷಗಳಲ್ಲಿ ಗ್ರಾಮದಲ್ಲಿ ಅಪಘಾತ ಸೇರಿದಂತೆ ವಿವಿಧ ಕಾರಣಗಳಿಂದ ಹಲವು ಸಾವುಗಳು ಸಂಭವಿಸಿದ್ದು, ಒಂದರ ಮೇಲೊಂದರಂತೆ ನಡೆದ ಘಟನೆಗಳು ಗ್ರಾಮಸ್ಥರಲ್ಲಿ ಭಯದ ವಾತಾವರಣ ಸೃಷ್ಟಿಸಿವೆ ಎನ್ನಲಾಗಿದೆ.
ಈ ಹಿನ್ನೆಲೆಯಲ್ಲಿ ಕೆಲ ಗ್ರಾಮಸ್ಥರು ಹಿರಿಯರೊಬ್ಬರ ಬಳಿ ಶಾಸ್ತ್ರ ಕೇಳಿಸಿದ್ದಾರೆ ಎನ್ನಲಾಗಿದ್ದು, ಗ್ರಾಮದಲ್ಲಿ ವಾಸಿಸುವ ಸ್ಥಳಕ್ಕೆ ಸಮಸ್ಯೆಯಿದ್ದು, ಇದೇ ಪ್ರದೇಶದಲ್ಲಿ ಮುಂದುವರಿದರೆ ಮತ್ತಷ್ಟು ಸಾವುಗಳು ಸಂಭವಿಸಬಹುದು ಎಂದು ಶಾಸ್ತ್ರದಲ್ಲಿ ತಿಳಿಸಲಾಗಿದೆ ಎಂಬ ನಂಬಿಕೆ ಗ್ರಾಮಸ್ಥರಲ್ಲಿ ಮೂಡಿದೆ. ಇದರಿಂದ ಆತಂಕಗೊಂಡ ಕುಟುಂಬಗಳು ಊರು ತೊರೆಯುವ ನಿರ್ಧಾರಕ್ಕೆ ಬಂದಿವೆ ಎನ್ನಲಾಗಿದೆ.
ಈಗಾಗಲೇ ಬಾಡಗುಂದದ 13 ಕುಟುಂಬಗಳು ಬೇರೆಡೆಗೆ ತೆರಳಿವೆ. ಜಂಗಲೇ ವಂಶಕ್ಕೆ ಸೇರಿದ ಆರು ಕುಟುಂಬಗಳು ರಾಮನಗರದ ಗಾರ್ಲಿ ಗ್ರಾಮಕ್ಕೆ, ಶಿಂಧೆ ವಂಶದ ನಾಲ್ಕು ಕುಟುಂಬಗಳು ರಾಮನಗರದ ಅಡಾಳಿ ಗ್ರಾಮಕ್ಕೆ ತೆರಳಿವೆ.
ಕರವತ್ತ ವಂಶದ ಒಂದು ಕುಟುಂಬ ಹಾಗೂ ರಾಮು ಪಾಟೀಲರ ಎರಡು ಕುಟುಂಬಗಳು ಯಲ್ಲಾಪುರಕ್ಕೆ ವಲಸೆ ಹೋಗಿವೆ. ರಾಮು ಶಿಂಗಾಡಿ ಕುಟುಂಬ ಜೋಯಿಡಾದ ಪನಸೋಲಿ ಗ್ರಾಮಕ್ಕೆ ತೆರಳಿದೆ ಎನ್ನಲಾಗಿದೆ. ಉಳಿದ ಕುಟುಂಬಗಳೂ ಊರು ಬಿಡುವ ಸಿದ್ಧತೆಯಲ್ಲಿವೆ ಎನ್ನಲಾಗಿದೆ.
ಪ್ರವಾಸೋದ್ಯಮದ ಬೆಳವಣಿಗೆಯ ನಡುವೆ ಭೂ ವ್ಯವಹಾರದ ಅನುಮಾನ:
ಬಾಡಗುಂದ ಗ್ರಾಮ ಕಾಳಿ ಹುಲಿ ಸಂರಕ್ಷಿತ ಪ್ರದೇಶದ ವ್ಯಾಪ್ತಿಯಲ್ಲಿದ್ದು, ಹಲವು ತಲೆಮಾರುಗಳಿಂದ ಗೌಳಿ ಸಮುದಾಯದವರು ಇಲ್ಲಿ ನೆಲೆಸಿದ್ದಾರೆ. ಇತ್ತೀಚಿನ ವರ್ಷಗಳಲ್ಲಿ ಈ ಭಾಗದಲ್ಲಿ ಪ್ರವಾಸೋದ್ಯಮವೂ ಅಭಿವೃದ್ಧಿಯಾಗುತ್ತಿದ್ದು, ಸುತ್ತಮುತ್ತ ರೆಸಾರ್ಟ್ಗಳು ಹಾಗೂ ಹೋಂಸ್ಟೇಗಳು ನಿರ್ಮಾಣಗೊಂಡಿವೆ.
ಈ ಬೆಳವಣಿಗೆಯ ನಡುವೆಯೇ ಗ್ರಾಮಸ್ಥರು ತಮ್ಮ ನೆಲೆ ತೊರೆಯುತ್ತಿರುವುದರಿಂದ ಭೂ ವ್ಯವಹಾರಗಳ ಕುರಿತ ಅನುಮಾನಗಳೂ ವ್ಯಕ್ತವಾಗಿವೆ. ಗ್ರಾಮಸ್ಥರ ಆತಂಕದ ಹಿಂದೆ ರಿಯಲ್ ಎಸ್ಟೇಟ್ ಹಿತಾಸಕ್ತಿಗಳ ಪಾತ್ರವಿದೆಯೇ ಎಂಬ ಪ್ರಶ್ನೆಗಳು ಕೆಲವರಿಂದ ಕೇಳಿಬಂದಿವೆ. ಆದರೆ, ಈ ಆರೋಪಗಳು ಅಥವಾ ಅನುಮಾನಗಳಿಗೆ ಸದ್ಯ ಯಾವುದೇ ದೃಢವಾದ ಆಧಾರ ಲಭ್ಯವಾಗಿಲ್ಲ.
ತಹಸೀಲ್ದಾರ್ ಭೇಟಿ, ತನಿಖೆಗೆ ಸೂಚನೆ:
ಗ್ರಾಮಸ್ಥರು ಊರು ತೊರೆಯುತ್ತಿರುವ ಮಾಹಿತಿ ಹಿನ್ನೆಲೆಯಲ್ಲಿ ತಹಸೀಲ್ದಾರ್ ಮಂಜುನಾಥ್ ಬಾಡಗುಂದಕ್ಕೆ ಭೇಟಿ ನೀಡಿ ಸ್ಥಳೀಯರಿಂದ ಮಾಹಿತಿ ಸಂಗ್ರಹಿಸಿದ್ದಾರೆ ಎನ್ನಲಾಗಿದೆ. ಘಟನೆಗೆ ನಿಜವಾದ ಕಾರಣವೇನು ಎಂಬುದನ್ನು ಪತ್ತೆಹಚ್ಚಲು ಜಿಲ್ಲಾಧಿಕಾರಿ ತನಿಖೆಗೆ ಸೂಚಿಸಿದ್ದಾರೆ.
ಅಧಿಕಾರಿಗಳು ಗ್ರಾಮಸ್ಥರೊಂದಿಗೆ ಸಭೆ ನಡೆಸಿ ಅವರ ಆತಂಕಕ್ಕೆ ಕಾರಣಗಳನ್ನು ಆಲಿಸುವುದು, ಸಾವುಗಳ ಕುರಿತು ವಾಸ್ತವಾಂಶಗಳನ್ನು ಪರಿಶೀಲಿಸುವುದು ಹಾಗೂ ಜನರಲ್ಲಿ ಅರಿವು ಮೂಡಿಸುವ ಪ್ರಯತ್ನ ನಡೆಸಲಿದ್ದಾರೆ ಎನ್ನಲಾಗಿದೆ.
ಶಾಸ್ತ್ರವೇ ಕಾರಣವೇ? ಅಥವಾ ಬೇರೆ ಹಿತಾಸಕ್ತಿಯೇ?
ಮೂರು ತಲೆಮಾರುಗಳಿಂದ ಬದುಕು ಕಟ್ಟಿಕೊಂಡಿದ್ದ ನೆಲವನ್ನೇ ಭಯದ ಕಾರಣಕ್ಕೆ ಕುಟುಂಬಗಳು ತೊರೆಯುತ್ತಿರುವುದು ವಿಷಾದನೀಯ ಬೆಳವಣಿಗೆಯಾಗಿದೆ. ಗ್ರಾಮದಲ್ಲಿ ಸಂಭವಿಸಿರುವ ಸಾವುಗಳಿಗೆ ನಿಖರ ಕಾರಣವೇನು? ಅವುಗಳ ಹಿಂದೆ ಯಾವುದೇ ವಾಸ್ತವಿಕ ಅಥವಾ ವೈಜ್ಞಾನಿಕ ಕಾರಣಗಳಿವೆಯೇ? ಶಾಸ್ತ್ರದ ಹೆಸರಿನಲ್ಲಿ ಜನರಲ್ಲಿ ಭಯ ಮೂಡಿಸಲಾಗಿದೆಯೇ? ಅಥವಾ ಗ್ರಾಮಸ್ಥರ ಆತಂಕದ ಹಿಂದೆ ಬೇರೆ ಯಾವುದೇ ಹಿತಾಸಕ್ತಿಗಳಿವೆಯೇ ಎಂಬ ಪ್ರಶ್ನೆಗಳು ಇದೀಗ ಎದುರಾಗಿವೆ.
ಈ ಎಲ್ಲ ಅನುಮಾನಗಳಿಗೆ ವೈಜ್ಞಾನಿಕ ಹಾಗೂ ಆಡಳಿತಾತ್ಮಕ ತನಿಖೆಯ ಮೂಲಕ ಉತ್ತರ ಕಂಡುಕೊಳ್ಳಬೇಕಿದೆ. ಜನರ ಭಯವನ್ನು ನಿವಾರಿಸಿ, ವಾಸ್ತವಾಂಶಗಳನ್ನು ಬಹಿರಂಗಪಡಿಸುವ ಮೂಲಕ ಬಾಡಗುಂದದ ಗೌಳಿ ಕುಟುಂಬಗಳಿಗೆ ತಮ್ಮ ನೆಲದಲ್ಲೇ ಸುರಕ್ಷಿತವಾಗಿ ಬದುಕುವ ವಿಶ್ವಾಸ ಮೂಡಿಸುವುದು ಆಡಳಿತದ ಮುಂದಿರುವ ಪ್ರಮುಖ ಸವಾಲಾಗಿದೆ.