ಡೈಲಿವಾರ್ತೆ:28/ಸೆ./2026
ಸೌದಿಯಲ್ಲಿ ಮಾದಕವಸ್ತು ಕಳ್ಳಸಾಗಣೆ ಪ್ರಕರಣ: ಕೇರಳ ಮೂಲದ ವ್ಯಕ್ತಿಗೆ ಮರಣದಂಡನೆ ಜಾರಿ
ದಮ್ಮಾಮ್: ಮಾದಕವಸ್ತು ಕಳ್ಳಸಾಗಣೆ ಪ್ರಕರಣದಲ್ಲಿ ಕೇರಳ ಮೂಲದ ವ್ಯಕ್ತಿಯೊಬ್ಬನಿಗೆ ಸೌದಿ ಅರೇಬಿಯಾದ ದಮ್ಮಾಮ್ನಲ್ಲಿ ಮರಣದಂಡನೆ ಜಾರಿಗೊಳಿಸಲಾಗಿದೆ.
ಕಣ್ಣೂರು ಜಿಲ್ಲೆಯ ತಲಶ್ಶೇರಿ ಸಮೀಪದ ಮಾಹಿ ಪೆರಿಂಗಡಿ ಮೂಲದ ಅಬುಟ್ಟಿ ವೆಲ್ಲಿ (41) ಶಿಕ್ಷೆಗೆ ಒಳಗಾದ ವ್ಯಕ್ತಿ ಎಂದು ಗುರುತಿಸಲಾಗಿದೆ. ಮರಣದಂಡನೆ ಜಾರಿಗೊಳಿಸಿರುವುದನ್ನು ಸೌದಿ ಅರೇಬಿಯಾ ಗೃಹ ಸಚಿವಾಲಯ ಅಧಿಕೃತವಾಗಿ ದೃಢಪಡಿಸಿದೆ.
2023ರಲ್ಲಿ ಓಮನ್ನಿಂದ ಸೌದಿ ಅರೇಬಿಯಾಕ್ಕೆ ರಸ್ತೆ ಮಾರ್ಗವಾಗಿ ಭಾರಿ ಪ್ರಮಾಣದ ಮಾದಕವಸ್ತು ಸಾಗಾಟ ಮಾಡುತ್ತಿದ್ದ ಆರೋಪದ ಹಿನ್ನೆಲೆಯಲ್ಲಿ ಅಬುಟ್ಟಿಯನ್ನು ಬಂಧಿಸಲಾಗಿತ್ತು. ಅವರು 43 ಕೆ.ಜಿ. ಮಾದಕವಸ್ತು ಸಾಗಿಸುತ್ತಿದ್ದ ಜಿಎಂಸಿ ವ್ಯಾನ್ ಚಾಲನೆ ಮಾಡುತ್ತಿದ್ದರು ಎಂದು ಪ್ರಕರಣದಲ್ಲಿ ಆರೋಪಿಸಲಾಗಿತ್ತು.
ಪ್ರಕರಣದ ವಿಚಾರಣೆ ವೇಳೆ ಪ್ರಾಸಿಕ್ಯೂಷನ್ ಮಂಡಿಸಿದ ಸಾಕ್ಷ್ಯಾಧಾರಗಳನ್ನು ಪರಿಗಣಿಸಿದ ವಿಚಾರಣಾ ನ್ಯಾಯಾಲಯ ಅಬುಟ್ಟಿಗೆ ಮರಣದಂಡನೆ ವಿಧಿಸಿತ್ತು. ಬಳಿಕ ಮೇಲ್ಮನವಿ ನ್ಯಾಯಾಲಯ ಹಾಗೂ ಸೌದಿ ಸುಪ್ರೀಂ ಕೋರ್ಟ್ ಕೂಡ ಶಿಕ್ಷೆಯನ್ನು ಎತ್ತಿಹಿಡಿದಿದ್ದವು.
ಅಂತಿಮವಾಗಿ ರಾಜಮನೆತನದ ಅನುಮೋದನೆಯ ಬಳಿಕ ಶಿಕ್ಷೆಯನ್ನು ಜಾರಿಗೊಳಿಸಲಾಗಿದೆ ಎಂದು ಸೌದಿ ಗೃಹ ಸಚಿವಾಲಯ ತಿಳಿಸಿದೆ. ಮಾದಕವಸ್ತು ಕಳ್ಳಸಾಗಣೆ ಪ್ರಕರಣಗಳಲ್ಲಿ ಸೌದಿ ಅರೇಬಿಯಾದ ಕಠಿಣ ಕಾನೂನು ಕ್ರಮದ ಮತ್ತೊಂದು ಉದಾಹರಣೆಯಾಗಿ ಈ ಪ್ರಕರಣ ಗಮನ ಸೆಳೆದಿದೆ.