ಡೈಲಿ ವಾರ್ತೆ: 07/JAN/2024
ಭಾಗವತ ಕೊಕ್ಕರ್ಣೆ ಸದಾಶಿವ ಆಮೀನ್ ಅವರಿಗೆ “ಕಲಾಸ್ನೇಹ” ಪ್ರಶಸ್ತಿ ಪ್ರದಾನ
ಬ್ರಹ್ಮಾವರ: ಬಾರ್ಕೂರು ಕೀರ್ತಿಶೇಷ ಯಕ್ಷಗಾನ ಕಲಾವಿದ ಶ್ರೀ ಸಾಧು ಕೊಠಾರಿಯವರ ಸ್ಮರಣಾರ್ಥ ಆವರ ಮಕ್ಕಳು ಹಾಗೂ ಕುಟುಂಬದವರು ಸತತ ಮೂರನೇ ವರುಷ ನೀಡುತ್ತಿರುವ *ಕಲಾಸ್ನೇಹ* ಪ್ರಶಸ್ತಿ ಯನ್ನು ಈ ವರುಷ ದಿವಂಗತ ಶ್ರೀ ಕಾಳಿಂಗ ನಾವುಡರ ರಂಗಶಿಷ್ಯ ಹಿರಿಯ ಭಾಗವತರಾದ ಕೊಕ್ಕರ್ಣೆ ಸದಾಶಿವ ಆಮೀನ್ ಮತ್ತು ಯುವ ಪ್ರತಿಭಾವಂತ ಶ್ರೀ ಮಂದರ್ತಿ ಮೇಳದ ಪ್ರಧಾನ ಸ್ತ್ರೀ ಪಾತ್ರಧಾರಿಗಳಾದ ದಿನಕರ ಕುಂದರ್ ನಡೂರು ಇವರಿಗೆ ಗೌರವಪೂರ್ವಕವಾಗಿ ನೀಡಿ ಸತ್ಕರಿಸಲಾಯಿತು.
ಈ ಸಂದರ್ಭದಲ್ಲಿ ಶ್ರೀ ಸಾಧು ಕೊಠಾರಿಯವರ ಮಕ್ಕಳು, ಕುಟುಂಬದ ಸದಸ್ಯರು ಊರಿನ ಗಣ್ಯರು ಉಪಸ್ಥಿತರಿದ್ದರು.
ಬಳಿಕ ಶ್ರೀ ಮಹಾಗಣಪತಿ ಯಕ್ಷಗಾನ ಮಂಡಳಿ,ನಡೂರು, ಮಂದರ್ತಿ ಇವರಿಂದ ಕಳೆದ ವರುಷ ಮಳೆಗಾಲದಲ್ಲಿ ಯಕ್ಷಗಾನ ರಂಗದಲ್ಲಿ ಜಯಭೇರಿ ಭಾರಿಸಿದ ಶ್ರೀ ಸದಾಶಿವ ಆಮೀನ್ ವಿರಚಿತ, ಶಿವದೂತ ಪಂಜುರ್ಲಿ ಎಂಬ ಕಥಾನಕದ ಆದ್ದೂರಿ ಪ್ರದರ್ಶನ ನಡೆಯಿತು.
ಕೊನೆಯಲ್ಲಿ ಮಿಥುನ್ ಸಾಧು ಕೊಠಾರಿ ಯವರು ಸರ್ವರಿಗೂ ಧನ್ಯವಾದ ಸಮರ್ಪಣೆ ಮಾಡಿದರು.