ಡೈಲಿ ವಾರ್ತೆ: ಮಾ./08/2026
ಮಧ್ಯಪ್ರಾಚ್ಯದಲ್ಲಿ ಯುದ್ಧ ಭೀಕರ: ಅರಬ್ ರಾಷ್ಟ್ರಗಳ ಜಲಮೂಲಗಳ ಮೇಲೆ ಇರಾನ್ ಅನಿರೀಕ್ಷಿತ ದಾಳಿ
ದುಬೈ: ಮಧ್ಯಪ್ರಾಚ್ಯದಲ್ಲಿ ಯುದ್ಧ ಆರಂಭವಾಗಿ ಒಂಬತ್ತು ದಿನಗಳು ಕಳೆಯುತ್ತಾ ಬಂದಿದ್ದು, ಪರಿಸ್ಥಿತಿ ಈಗ ನಿಯಂತ್ರಣ ಮೀರುತ್ತಿದೆ. ಭಾನುವಾರ ಮುಂಜಾನೆ ಇರಾನ್ ಮತ್ತು ಇಸ್ರೇಲ್ ನಡುವೆ ನಡೆದ ಭೀಕರ ವಾಯುದಾಳಿಗಳು ಗಲ್ಫ್ ರಾಷ್ಟ್ರಗಳನ್ನು ಯುದ್ಧದ ಸುಳಿಗೆ ಸಿಲುಕಿಸಿವೆ.
ಇತಿಹಾಸದಲ್ಲೇ ಮೊದಲ ಬಾರಿಗೆ ಅರಬ್ ರಾಷ್ಟ್ರವೊಂದರ ಮೂಲಸೌಕರ್ಯದ ಮೇಲೆ ಇರಾನ್ ನೇರ ದಾಳಿ ನಡೆಸಿರುವುದು ಇಡೀ ವಿಶ್ವದ ಆತಂಕಕ್ಕೆ ಕಾರಣವಾಗಿದೆ.
ಬಹ್ರೇನ್ ಜಲಶುದ್ಧೀಕರಣ ಘಟಕವೇ ಗುರಿ:
ಇರಾನ್ ನಡೆಸಿದ ಡ್ರೋನ್ ದಾಳಿಯು ಬಹ್ರೇನ್ನ ಪ್ರಮುಖ ಜಲಶುದ್ಧೀಕರಣ ಘಟಕವನ್ನು ಗುರಿಯಾಗಿಸಿಕೊಂಡಿದೆ. ಪರ್ಷಿಯನ್ ಗಲ್ಫ್ ಕರಾವಳಿಯ ಈ ಘಟಕಕ್ಕೆ ಭಾರಿ ಹಾನಿಯಾಗಿದ್ದು, ಅರಬ್ ರಾಷ್ಟ್ರಗಳ ಕುಡಿಯುವ ನೀರಿನ ಭದ್ರತೆಗೆ ದೊಡ್ಡ ಸವಾಲು ಎದುರಾಗಿದೆ.
ಮುಹರಕ್ ನಗರದಲ್ಲಿ ಕ್ಷಿಪಣಿ ಅವಶೇಷಗಳು ಬಿದ್ದ ಪರಿಣಾಮ ಮೂವರು ಗಾಯಗೊಂಡಿದ್ದಾರೆ ಎಂದು ವರದಿಯಾಗಿದೆ.
ಲೆಬನಾನ್ನಲ್ಲಿ ರಕ್ತಪಾತ – ಇಸ್ರೇಲ್ ಎಚ್ಚರಿಕೆ:
ದಕ್ಷಿಣ ಲೆಬನಾನ್ ಮತ್ತು ಬೈರುತ್ ಮೇಲೆ ಇಸ್ರೇಲ್ ಸರಣಿ ವಾಯುದಾಳಿಗಳನ್ನು ಮುಂದುವರಿಸಿದೆ. ಇರಾನ್ನ ಕ್ರಾಂತಿಕಾರಿ ಪಡೆಯ (Quds Force) ಕಮಾಂಡರ್ಗಳೇ ಗುರಿಯಾಗಿದ್ದ ಈ ದಾಳಿಯಲ್ಲಿ 12 ಜನರು ಸಾವನ್ನಪ್ಪಿದ್ದಾರೆ. “ಮುಂದಿನ ಹಂತದಲ್ಲಿ ನಾವು ಇನ್ನೂ ಅನೇಕ ಅಚ್ಚರಿಗಳನ್ನು ನೀಡಲಿದ್ದೇವೆ,” ಎಂದು ಇಸ್ರೇಲ್ ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಎಚ್ಚರಿಸುವ ಮೂಲಕ ಯುದ್ಧ ಮತ್ತಷ್ಟು ತೀವ್ರಗೊಳ್ಳುವ ಸೂಚನೆ ನೀಡಿದ್ದಾರೆ.
ಇರಾನ್ ವಾಯುಪಡೆಗೆ ಪೆಟ್ಟು:
ಇರಾನ್ನ ಇಸ್ಫಹಾನ್ ವಿಮಾನ ನಿಲ್ದಾಣದ ಮೇಲೆ ಇಸ್ರೇಲ್ ನಡೆಸಿದ ದಾಳಿಯು ಆಯಕಟ್ಟಿನದ್ದಾಗಿದೆ. ಇರಾನ್ ವಾಯುಪಡೆಯ ಬೆನ್ನೆಲುಬಾಗಿರುವ ಎಫ್-14 (F-14) ಯುದ್ಧ ವಿಮಾನಗಳನ್ನು ಗುರಿಯಾಗಿಸಿ ಇಸ್ರೇಲ್ ದಾಳಿ ನಡೆಸಿದ್ದು, ಇರಾನ್ನ ರಕ್ಷಣಾ ಕವಚವನ್ನು ಭೇದಿಸುವಲ್ಲಿ ಯಶಸ್ವಿಯಾಗಿದೆ ಎಂದು ವಿಶ್ಲೇಷಿಸಲಾಗುತ್ತಿದೆ.
ದುಬೈನಲ್ಲಿ ಸೈರನ್ ಹಬ್ಬಿಸಿದ ಆತಂಕ:
ಭಾನುವಾರ ಬೆಳಿಗ್ಗೆ ದುಬೈನಲ್ಲಿ ಕ್ಷಿಪಣಿ ದಾಳಿಯ ಮುನ್ಸೂಚನೆ ನೀಡುವ ಸೈರನ್ಗಳು ಮೊಳಗಿದ್ದು, ಜನಜೀವನ ಅಸ್ತವ್ಯಸ್ತಗೊಂಡಿದೆ. ಕುವೈತ್ ಗಡಿಯಲ್ಲಿ ನಡೆದ ಡ್ರೋನ್ ದಾಳಿಗೆ ಇಬ್ಬರು ಭದ್ರತಾ ಸಿಬ್ಬಂದಿ ಬಲಿಯಾಗಿದ್ದಾರೆ. ಶನಿವಾರ ಇರಾನ್ನ ತೈಲ ಶೇಖರಣಾ ಘಟಕದ ಮೇಲೆ ಇಸ್ರೇಲ್ ನಡೆಸಿದ ದಾಳಿಯು ನಾಗರಿಕ ಕೈಗಾರಿಕಾ ವಲಯದ ಮೇಲಿನ ಮೊದಲ ದಾಳಿಯೆಂದು ಗುರುತಿಸಲಾಗಿದೆ.