ಡೈಲಿವಾರ್ತೆ:02/ಏಪ್ರಿಲ್ /2026
ನೀರಿನ ಬಕೆಟ್ನಲ್ಲಿ ಮುಳುಗಿ ಮಗು ಸಾವು: ಸಾವಿನ ಶೋಕದಲ್ಲಿ ತಾಯಿ ಆತ್ಮಹತ್ಯೆ!
ಬೆಂಗಳೂರು: ಸಿಲಿಕಾನ್ ಸಿಟಿಯ ಚಂದ್ರಾಲೇಔಟ್ ಸಮೀಪದ ಭೈರವೇಶ್ವರ ನಗರದಲ್ಲಿ ಕರುಳು ಹಿಂಡುವ ಘಟನೆಯೊಂದು ನಡೆದಿದೆ. ಆಟವಾಡುತ್ತಿದ್ದ ಕಂದಮ್ಮ ನೀರಿನ ಬಕೆಟ್ನಲ್ಲಿ ಮುಳುಗಿ ಮೃತಪಟ್ಟಿದ್ದನ್ನು ಕಂಡ ತಾಯಿ, ತೀವ್ರ ಆಘಾತ ಮತ್ತು ಅಪರಾಧ ಪ್ರಜ್ಞೆಯಿಂದಾಗಿ ತಾನೂ ಪ್ರಾಣ ಕಳೆದುಕೊಂಡಿದ್ದಾರೆ.
ಘಟನೆಯ ವಿವರ:
ಮೃತ ಮಹಿಳೆಯನ್ನು ಪ್ರತಿಭಾ (29) ಹಾಗೂ ಅವರ ಪುತ್ರನನ್ನು ಅಗಸ್ತ್ಯ ಎಂದು ಗುರುತಿಸಲಾಗಿದೆ. ಸಾಫ್ಟ್ವೇರ್ ದಂಪತಿಗಳಾದ ಪ್ರತಿಭಾ ಮತ್ತು ಮಹಂತೇಶ್ ಅವರು ಭೈರವೇಶ್ವರ ನಗರದಲ್ಲಿ ವಾಸವಿದ್ದರು. ಪ್ರತಿಭಾ ಅವರು ಮನೆಯಿಂದಲೇ ಕೆಲಸ (Work from Home) ಮಾಡುತ್ತಿದ್ದರು. ಘಟನೆಯ ವೇಳೆ ಪತಿ ಮಹಂತೇಶ್ ಕೆಲಸದ ನಿಮಿತ್ತ ಹೊರಹೋಗಿದ್ದರು.
ಅಪಘಾತ ಸಂಭವಿಸಿದ್ದು ಹೇಗೆ?
ಪ್ರತಿಭಾ ಅವರು ಒಣಗಲು ಹಾಕಿದ್ದ ಬಟ್ಟೆಗಳನ್ನು ತರಲು ಮಹಡಿಯ ಮೇಲಕ್ಕೆ ಹೋಗಿದ್ದಾಗ, ಮನೆಯೊಳಗೆ ಒಬ್ಬನೇ ಆಟವಾಡುತ್ತಿದ್ದ ಮಗು ಅಗಸ್ತ್ಯ ಬಚ್ಚಲು ಮನೆಗೆ ಹೋಗಿದ್ದಾನೆ. ಅಲ್ಲಿ ನೀರಿಟ್ಟಿದ್ದ ಬಕೆಟ್ನಲ್ಲಿ ಆಟವಾಡಲು ಹೋಗಿ ಮಗು ನೀರಿಗೆ ಮುಳುಗಿ ಉಸಿರುಗಟ್ಟಿ ಸಾವನ್ನಪ್ಪಿದೆ. ಮೇಲಿಂದ ಬಂದ ತಾಯಿ ಮಗುವಿನ ಸ್ಥಿತಿಯನ್ನು ಕಂಡು ದಿಕ್ಕುತೋಚದಂತಾಗಿದ್ದಾರೆ. ತನ್ನ ನಿರ್ಲಕ್ಷ್ಯವೇ ಮಗುವಿನ ಸಾವಿಗೆ ಕಾರಣವೆಂಬ ಅತಿಯಾದ ನೋವಿನಿಂದ ಅವರು ಆತ್ಮಹತ್ಯೆಯ ಹಾದಿ ಹಿಡಿದಿದ್ದಾರೆ.
ಡೆತ್ನೋಟ್ನಲ್ಲಿ ಅಡಗಿದೆ ಮಮ್ಮಲ ಮರುಗು:
ಸ್ಥಳದಲ್ಲಿ ಸಿಕ್ಕಿರುವ ಡೆತ್ನೋಟ್ನಲ್ಲಿ ಪ್ರತಿಭಾ ಅವರು ತಮ್ಮ ನೋವನ್ನು ತೋಡಿಕೊಂಡಿದ್ದಾರೆ.
”ನಾನು ಬಟ್ಟೆ ತರಲು ಟೆರೇಸ್ಗೆ ಹೋಗಿದ್ದೆ, ಈ ವೇಳೆ ಮಗು ಬಕೆಟ್ ನೀರಿನಲ್ಲಿ ಬಿದ್ದು ಸತ್ತಿದೆ. ನನ್ನ ಮಗುವನ್ನು ಉಳಿಸಿಕೊಳ್ಳಲು ನನಗಾಗಲಿಲ್ಲ. ಮಗುವಿನ ಸಾವಿಗೆ ನಾನೇ ನೇರ ಹೊಣೆ,” ಎಂದು ಅವರು ಬರೆದಿದ್ದಾರೆ.
ಆತ್ಮಹತ್ಯೆಗೆ ಹಲವು ಪ್ರಯತ್ನ:
ಮಗುವಿನ ಸಾವಿನಿಂದ ಕಂಗೆಟ್ಟಿದ್ದ ಪ್ರತಿಭಾ ಅವರು ಮೊದಲು 15 ಮಾತ್ರೆಗಳನ್ನು ನುಂಗಿ, ನಂತರ ಕೈಯನ್ನು ಕುಯ್ದುಕೊಂಡು ಪ್ರಾಣ ಬಿಡಲು ಯತ್ನಿಸಿದ್ದಾರೆ. ಅದೂ ಸಾಧ್ಯವಾಗದಿದ್ದಾಗ ಕೊನೆಗೆ ಮಗುವನ್ನು ಹಾಸಿಗೆಯ ಮೇಲೆ ಮಲಗಿಸಿ ತಾನು ನೇಣಿಗೆ ಶರಣಾಗಿದ್ದಾರೆ.
ಮನೆಗೆ ಬಂದ ಪತಿಗೆ ಕಾದಿತ್ತು ಶಾಕ್:
ರಾತ್ರಿ ಕೆಲಸ ಮುಗಿಸಿ ಮನೆಗೆ ಮರಳಿದ ಮಹಂತೇಶ್, ಪತ್ನಿ ಬಾಗಿಲು ತೆರೆಯದಿದ್ದಾಗ ಕೀ ಬಳಸಿ ಒಳಹೋಗಿದ್ದಾರೆ. ಅಲ್ಲಿ ನೇಣು ಬಿಗಿದ ಸ್ಥಿತಿಯಲ್ಲಿದ್ದ ಪತ್ನಿ ಹಾಗೂ ಹಾಸಿಗೆಯ ಮೇಲೆ ಅನಾಥವಾಗಿ ಬಿದ್ದಿದ್ದ ಮಗುವನ್ನು ಕಂಡು ಸ್ತಬ್ದರಾಗಿದ್ದಾರೆ.
ಘಟನೆ ಸಂಬಂಧ ಚಂದ್ರಾಲೇಔಟ್ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ಮೃತದೇಹಗಳನ್ನು ಮರಣೋತ್ತರ ಪರೀಕ್ಷೆಗೆ ರವಾನಿಸಲಾಗಿದೆ. ಒಂದು ಕ್ಷಣದ ಅಚಾತುರ್ಯ ಸಾಫ್ಟ್ವೇರ್ ದಂಪತಿಯ ಸುಂದರ ಸಂಸಾರವನ್ನು ಬೀದಿಗೆ ತಂದಿದೆ.