ಡೈಲಿವಾರ್ತೆ: 28/ಮೇ/2026
ಡೊನಾಲ್ಡ್ ಟ್ರಂಪ್ ಎಮ್ಮೆ ಬಕ್ರೀದ್ ಬಲಿಯಿಂದ ಪಾರು: ವೈರಲ್ ಪ್ರಾಣಿಗೆ ರಾಷ್ಟ್ರೀಯ ಮೃಗಾಲಯದಲ್ಲಿ ಆಶ್ರಯ
ಢಾಕಾ: ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರನ್ನು ಹೋಲುತ್ತದೆ ಎಂಬ ಕಾರಣಕ್ಕೆ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ಚರ್ಚೆಗೆ ಗ್ರಾಸವಾಗಿದ್ದ ಅಪರೂಪದ ಅಲ್ಬಿನೋ ಎಮ್ಮೆ ಇದೀಗ ಬಕ್ರೀದ್ ಬಲಿಯಿಂದ ಪಾರಾಗಿದೆ. ಸಾರ್ವಜನಿಕರ ಭಾರೀ ಆಸಕ್ತಿ ಹಾಗೂ ಭದ್ರತಾ ಕಾರಣಗಳನ್ನು ಗಮನದಲ್ಲಿಟ್ಟುಕೊಂಡು ಬಾಂಗ್ಲಾದೇಶ ಸರ್ಕಾರ ಈ ಪ್ರಾಣಿಯನ್ನು ಖರೀದಿಸಿ ಢಾಕಾದ ರಾಷ್ಟ್ರೀಯ ಮೃಗಾಲಯಕ್ಕೆ ಸ್ಥಳಾಂತರಿಸಲು ನಿರ್ಧರಿಸಿದೆ.
ಸುಮಾರು 700 ಕೆಜಿ ತೂಕವಿರುವ ಈ ಎಮ್ಮೆ ತನ್ನ ವಿಶಿಷ್ಟ ದೇಹದ ಮೈಕಟ್ಟು, ಹಣೆ ಮತ್ತು ಕೂದಲಿನ ವಿನ್ಯಾಸದಿಂದಲೇ ಜನರ ಗಮನ ಸೆಳೆದಿತ್ತು. ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆದ ಫೋಟೋಗಳು ಮತ್ತು ವೀಡಿಯೊಗಳ ಬಳಿಕ ಜನರು ಇದನ್ನು “ಡೊನಾಲ್ಡ್ ಟ್ರಂಪ್ ಎಮ್ಮೆ” ಎಂದು ಕರೆಯಲು ಆರಂಭಿಸಿದ್ದರು.
ಈ ಎಮ್ಮೆ ಮೂಲತಃ ಜಿಯಾ ಉದ್ದೀನ್ ಮೃಧಾ ಎಂಬವರ ಪಾಲಿನಲ್ಲಿ ಇತ್ತು. ಬಕ್ರೀದ್ ಹಬ್ಬದ ಅಂಗವಾಗಿ ಪ್ರಾಣಿಯನ್ನು ಮಾರಾಟ ಮಾಡಲಾಗಿತ್ತು. ಆದರೆ, ಸಾರ್ವಜನಿಕರಲ್ಲಿ ಹೆಚ್ಚುತ್ತಿರುವ ಕುತೂಹಲ ಮತ್ತು ಭದ್ರತಾ ಸಮಸ್ಯೆಗಳ ಹಿನ್ನೆಲೆ ಸರ್ಕಾರಿ ಅಧಿಕಾರಿಗಳು ಕೊನೆಯ ಕ್ಷಣದಲ್ಲಿ ಮಧ್ಯಪ್ರವೇಶಿಸಿ ಪ್ರಾಣಿಯನ್ನು ರಕ್ಷಿಸಿದ್ದಾರೆ.
ಈ ಪ್ರಾಣಿಯ ಬಗ್ಗೆ ಸಾರ್ವಜನಿಕ ವಲಯದಲ್ಲಿ ಅಪಾರ ಆಸಕ್ತಿ ವ್ಯಕ್ತವಾಗಿತ್ತು. ಜನಸಂದಣಿ ಮತ್ತು ಭದ್ರತಾ ವಿಚಾರಗಳನ್ನು ಪರಿಗಣಿಸಿ, ಅದನ್ನು ಸುರಕ್ಷಿತ ಸ್ಥಳಕ್ಕೆ ಸ್ಥಳಾಂತರಿಸುವ ನಿರ್ಧಾರ ಕೈಗೊಳ್ಳಲಾಗಿದೆ ಎಂದು ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ. ಮಾಲೀಕ ಜಿಯಾ ಉದ್ದೀನ್ ಮೃಧಾ ಮಾತನಾಡಿ ನನ್ನ ಕಿರಿಯ ಸಹೋದರ ಅದರ ತಲೆಯ ಮೇಲಿನ ಕೂದಲನ್ನು ನೋಡಿ ತಮಾಷೆಯಾಗಿ ‘ಡೊನಾಲ್ಡ್ ಟ್ರಂಪ್’ ಎಂದು ಹೆಸರಿಟ್ಟಿದ್ದ. ಬಳಿಕ ಅದೇ ಹೆಸರು ಸಾಮಾಜಿಕ ಜಾಲತಾಣಗಳಲ್ಲಿ ಪ್ರಸಿದ್ಧಿಯಾಯಿತು ಎಂದು ತಿಳಿಸಿದ್ದಾರೆ. ಅಲ್ಬಿನೋ ಎಮ್ಮೆಗಳು ದಕ್ಷಿಣ ಏಷ್ಯಾದಲ್ಲಿ ಅಪರೂಪವಾಗಿದ್ದು, ಸಾಮಾನ್ಯವಾಗಿ ಅವು ಶಾಂತ ಸ್ವಭಾವಕ್ಕೆ ಹೆಸರುವಾಸಿಯಾಗಿವೆ. ಜೋಳ, ಸೋಯಾಬೀನ್ ಮತ್ತು ಪೌಷ್ಠಿಕ ಆಹಾರ ನೀಡಲಾಗುತ್ತಿರುವುದರಿಂದ ಈ ಎಮ್ಮೆ ಆರೋಗ್ಯಕರ ಹಾಗೂ ದಷ್ಟಪುಷ್ಟವಾಗಿರುವುದಾಗಿ ತಿಳಿದುಬಂದಿದೆ. ಇದರ ಮಧ್ಯೆ, “ಬೆಂಜಮಿನ್ ನೆತನ್ಯಾಹು” ಎಂಬ ಹೆಸರಿನ ಮತ್ತೊಂದು ಎಮ್ಮೆ ಕೂಡ ಸಾಮಾಜಿಕ ಜಾಲತಾಣಗಳಲ್ಲಿ ಚರ್ಚೆಗೆ ಕಾರಣವಾಗಿದೆ. 750 ಕೆಜಿಕಿಂತ ಅಧಿಕ ತೂಕವಿರುವ ಈ ಎಮ್ಮೆ ತನ್ನ ಆಕ್ರಮಣಕಾರಿ ಸ್ವಭಾವದಿಂದ ಗಮನ ಸೆಳೆಯುತ್ತಿದೆ. ವೈರಲ್ ಖ್ಯಾತಿಯಿಂದ ಬಲಿಯಿಂದ ಪಾರಾದ “ಡೊನಾಲ್ಡ್ ಟ್ರಂಪ್ ಎಮ್ಮೆ” ಇದೀಗ ಸಾರ್ವಜನಿಕ ಪ್ರದರ್ಶನದ ಪ್ರಮುಖ ಆಕರ್ಷಣೆಯಾಗುವ ಸಾಧ್ಯತೆ ಇದೆ.