ಡೈಲಿವಾರ್ತೆ: 16/ಜೂ./2026
ಕೋಟ: ಸರಕಾರಿ ಕೆಲಸದ ಆಮಿಷ ಒಡ್ಡಿ ಯುವತಿಗೆ ಲಕ್ಷಾಂತರ ರೂಪಾಯಿ ವಂಚನೆ – ಆರೋಪಿ ವಿರುದ್ಧ ಪ್ರಕರಣ ದಾಖಲು
ಬ್ರಹ್ಮಾವರ: ಸರಕಾರಿ ಕೆಲಸ ಕೊಡಿಸುವುದಾಗಿ ನಂಬಿಸಿ ಯುವತಿಯೊಬ್ಬರಿಂದ ಬರೋಬ್ಬರಿ 10.83 ಲಕ್ಷ ರೂಪಾಯಿ ಹಣ ಪಡೆದು, ಕೆಲಸವನ್ನೂ ಕೊಡಿಸದೆ, ಹಣವನ್ನೂ ಹಿಂತಿರುಗಿಸದೆ ವಂಚಿಸಿರುವ ಗಂಭೀರ ಪ್ರಕರಣವೊಂದು ಕೋಟ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿ ಬೆಳಕಿಗೆ ಬಂದಿದೆ.
ಐರೋಡಿ ಗ್ರಾಮದ ನಿವಾಸಿ ಕು. ಎಸ್ ವರ್ಷಾ (23) ಎಂಬುವವರೇ ವಂಚನೆಗೊಳಗಾದ ದುರ್ದೈವಿ. ಈ ಸಂಬಂಧ ಆರೋಪಿ ಅಭಿಷೇಕ್ ಎಂಬಾತನ ವಿರುದ್ಧ ಕೋಟ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಾಗಿದೆ.
ಪೊಲೀಸ್ ಮೂಲಗಳ ಮಾಹಿತಿ ಪ್ರಕಾರ, ಆರೋಪಿ ಅಭಿಷೇಕ್ ಫಿರ್ಯಾದುದಾರರಾದ ವರ್ಷಾ ಅವರಿಗೆ ತಾನು ಸರಕಾರಿ ಕೆಲಸ ಕೊಡಿಸುವುದಾಗಿ ನಂಬಿಸಿದ್ದನು. ಇದನ್ನು ಸತ್ಯವೆಂದು ನಂಬಿದ ವರ್ಷಾ ಅವರು ದಿನಾಂಕ 31.10.2025 ರಿಂದ 28.05.2026 ರ ಅವಧಿಯಲ್ಲಿ ಆರೋಪಿಯ ಬ್ಯಾಂಕ್ ಖಾತೆಗೆ ಹಾಗೂ ಆತನ ಫೋನ್ ಪೇ (PhonePe) ಮತ್ತು ಗೂಗಲ್ ಪೇ (Google Pay) ಮುಖಾಂತರ ಹಂತಹಂತವಾಗಿ ಒಟ್ಟು ರೂ. 10,83,000/- (ಹತ್ತು ಲಕ್ಷದ ಎಂಬತ್ತಮೂರು ಸಾವಿರ) ಹಣವನ್ನು ವರ್ಗಾವಣೆ ಮಾಡಿದ್ದರು. ಹಣ ಪಡೆದ ದೀರ್ಘಾವಧಿಯ ನಂತರವೂ ಆರೋಪಿ ಕೆಲಸ ಕೊಡಿಸದಿದ್ದಾಗ, ಸಂಶಯಗೊಂಡ ವರ್ಷಾ ಅವರು ತನಗೆ ಕೆಲಸ ಕೊಡಿಸುವಂತೆ ಅಥವಾ ತಾನು ನೀಡಿದ್ದ ಹಣವನ್ನು ವಾಪಾಸು ನೀಡುವಂತೆ ಕಟ್ಟುನಿಟ್ಟಾಗಿ ಕೇಳಿದ್ದಾರೆ. ಆದರೆ, ಆರೋಪಿಯು ಹಣವನ್ನು ಹಿಂತಿರುಗಿಸಲು ನಿರಾಕರಿಸಿದ್ದಲ್ಲದೆ, ಫಿರ್ಯಾದುದಾರರಿಗೆ ಅವಾಚ್ಯ ಶಬ್ದಗಳಿಂದ ನಿಂದಿಸಿ, ಪ್ರಾಣ ಬೆದರಿಕೆ (ಜೀವ ಬೆದರಿಕೆ) ಹಾಕಿದ್ದಾನೆ ಎನ್ನಲಾಗಿದೆ. ತಾನು ನಂಬಿದ ವ್ಯಕ್ತಿಯಿಂದಲೇ ಮೋಸ ಹೋಗಿರುವುದು ಹಾಗೂ ಜೀವಕ್ಕೆ ಅಪಾಯವಿರುವುದನ್ನು ಅರಿತ ಯುವತಿ ಅಂತಿಮವಾಗಿ ನ್ಯಾಯ ಕೋರಿ ಕೋಟ ಪೊಲೀಸ್ ಠಾಣೆಯ ಮೆಟ್ಟಿಲೇರಿದ್ದಾರೆ.
ಬಲಿಪಶು ಯುವತಿಯ ದೂರಿನ ಆಧಾರದ ಮೇಲೆ ಕೋಟ ಪೊಲೀಸ್ ಠಾಣೆಯಲ್ಲಿ ಆರೋಪಿ ಅಭಿಷೇಕ್ ವಿರುದ್ಧ ಅಪರಾಧ ಕ್ರಮಾಂಕ 102/2026 ರಂತೆ, ಭಾರತೀಯ ನ್ಯಾಯ ಸಂಹಿತೆ (BNS) ಯ ವಿವಿಧ ಗಂಭೀರ ಕಲಂಗಳುಗಳಾದ 316(2), 318(4), 352, ಮತ್ತು 351(2) ರ ಅಡಿಯಲ್ಲಿ ಪ್ರಕರಣ ದಾಖಲಿಸಿಕೊಳ್ಳಲಾಗಿದೆ. ಸದ್ಯ ಪೊಲೀಸರು ಪ್ರಕರಣವನ್ನು ಕೈಗೆತ್ತಿಕೊಂಡಿದ್ದು, ತನಿಖೆ ಚುರುಕುಗೊಳಿಸಿದ್ದಾರೆ.