ಡೈಲಿ ವಾರ್ತೆ:09 ಜೂನ್ 2023
ಕೋಟ ಮಣೂರು ಗಾಂಜಾ ಮಾರಾಟ ಮಾಡುತ್ತಿದ್ದ ಇಬ್ಬರ ಬಂಧನ!
ಕೋಟ : ಕೋಟ ಮಣೂರಿನಲ್ಲಿ ಗಾಂಜಾ ಮಾರಾಟ ಮಾಡಲು ಪ್ರಯತ್ನಿಸುತ್ತಿದ್ದ ಇಬ್ಬರನ್ನು ಪೊಲೀಸರು ಬಂಧಿಸಿರುವ ಘಟನೆ ಶುಕ್ರವಾರ ನಡೆದಿದೆ.
ಅಸ್ಸಾಂ ರಾಜ್ಯದ ಸದಾಂ ಹುಸೇನ್ ಮತ್ತು ಅಫ್ರಾಬ್ ಹುಸೇನ್ ಬಂಧಿತರು.
ಕೋಟ ಠಾಣೆಯ ಪಿಎಸ್ಐ ಮಧು ಬಿಇ ರವರು ರೌಂಡ್ಸ್ ನಲ್ಲಿರುವ ಸಂದರ್ಭ ಮಣೂರು ಬಾಳೆಬೆಟ್ಟು ಬಸ್ಸು ನಿಲ್ದಾಣದ ಬಳಿ ಇಬ್ಬರು ಪ್ಲಾಸ್ಟಿಕ್ ಚೀಲವನ್ನು ಹಿಡಿದುಕೊಂಡಿದ್ದು, ಪೊಲೀಸರನ್ನು ನೋಡಿ ಓಡಲು ಯತ್ನಿಸಿದ್ದರು. ಸಿಬ್ಬಂದಿ ಸಹಾಯದಿಂದ ಈರ್ವರನ್ನು ವಿಚಾರಿಸಿದಾಗ ಪ್ಲಾಸ್ಟಿಕ್ ಕವರ್ ನಲ್ಲಿ ಮಾದಕ ವಸ್ತು ಗಾಂಜಾ ಇರುವ ಬಗ್ಗೆ ಒಪ್ಪಿಕೊಂಡಿದ್ದರು. ಬಂಧಿತರಿಂದ ರೂ.28ಸಾವಿರ ಮೌಲ್ಯದ 920 ಗ್ರಾಂ ಮಾದಕ ವಸ್ತುವನ್ನು ವಶಪಡಿಸಿಕೊಂಡು ನ್ಯಾಯಾಲಯಕ್ಕೆ ಹಾಜರು ಪಡಿಸಲಾಗಿದೆ.
ಜಿಲ್ಲಾ ಎಸ್ .ಪಿ ಅಕ್ಷಯ ಎಂ ಎಚ್ ಅವರ ನಿರ್ದೇಶನದಂತೆ ಹೆಚ್ಚುವರಿ ಅಧೀಕ್ಷಕ ಎಸ್.ಟಿ ಲಿಂಗಪ್ಪ ಮತ್ತು ಉಡುಪಿ ಉಪವಿಭಾಗದ ಪೊಲೀಸ್ ಉಪಾಧೀಕ್ಷಕ ದಿನಕರ ಕೆ.ಪಿ ಮಾರ್ಗದರ್ಶನದಲ್ಲಿ ಬ್ರಹ್ಮಾವರ ಸಿಪಿಐ ದಿವಾಕರ ಪಿ ಎಂ ಅವರ ನೇತೃತ್ವದಲ್ಲಿ ಕೋಟ ಪೊಲೀಸ್ ಠಾಣೆಯ ಸಬ್ ಇನ್ಸ್ ಪೆಕ್ಟರ್ ಮಧು ಬಿ.ಇ ಈ ಕಾರ್ಯಾಚರಣೆ ನಡೆಸಿದ್ದರು.
ಸಿಬ್ಬಂದಿಗಳಾದ ಎಎಸ್ಐ ರವಿ ಕುಮಾರ್, ಹೆಡ್ ಕಾನ್ ಸ್ಟೇಬಲ್ ಮೋಹನ್ ಕೊತ್ವಾಲ್, ರಾಘವೇಂದ್ರ, ಸಂತೋಷ್, ರೇವತಿ, ಪ್ರಸನ್ನ ರವರು ಸಹಕರಿಸಿದರು.