ಡೈಲಿ ವಾರ್ತೆ: 29/Sep/2023
ಪಾರಂಪಳ್ಳಿ ನೂರುಲ್ ಇಸ್ಲಾಂ ಮದರಸದಲ್ಲಿ ಈದ್ ಮಿಲಾದ್ ಕಾರ್ಯಕ್ರಮ ಹಾಗೂ ಸೌಹಾರ್ದ ಸಂಗಮ, ನಿವೃತ್ತ ಅಧ್ಯಾಪಕರಿಗೆ ಸನ್ಮಾನ
ಕೋಟ : ಪ್ರವಾದಿ ಮಹಮ್ಮದ್ ಪೈಗಂಬರ್ (ಸ.ಅ.) ಅವರ ಜನ್ಮದಿನ ಮಿಲಾದುನ್ನಬಿ ಆಚರಣೆ ಹಾಗೂ ಸೌಹಾರ್ದ ಸಂಗಮ ಕಾರ್ಯಕ್ರಮವು ಉಡುಪಿ ಜಿಲ್ಲೆಯ ಬ್ರಹ್ಮಾವರ ತಾಲೂಕಿನ ಸಾಲಿಗ್ರಾಮ ವಾರ್ಡಿನ ಪಾರಂಪಳ್ಳಿ ನೂರುಲ್ ಇಸ್ಲಾಂ ಮದರಸದಲ್ಲಿ ಸೆ. 28 ರಂದು ಗುರುವಾರ ವಿಜೃಂಭಣೆಯಿಂದ ನಡೆಯಿತು.
ಕಾರ್ಯಕ್ರಮದ ಅಧ್ಯಕ್ಷತೆಯನ್ನು ಮದರಸದ ಅಧ್ಯಕ್ಷರಾದ ಇಸ್ಮಾಯಿಲ್ ಪಿ. ಅವರು ವಹಿಸಿದ್ದರು.
ಮದರಸದ ಉಸ್ತಾದರಾದ ಉಮ್ಮರುಲ್ ಫಾರೂಕ್ ರವರ ನೇತೃತ್ವದಲ್ಲಿ ಮೌಲೂದು ಹಾಗೂ ಸಮೂಹಿಕ ಪ್ರಾಥನೆ ನೆರವೇರಿತು.
ಈ ಸಂದರ್ಭದಲ್ಲಿ ಸೌಹಾರ್ದ ಸಂಗಮವಾಗಿ ಖಾಸಗಿ ಹಿರಿಯ ಪ್ರಾಥಮಿಕ ಶಾಲೆ ಪಾರಂಪಳ್ಳಿ ಇದರ ಮೂವರು ನಿವೃತ್ತ ಅಧ್ಯಾಪಕರಾದ ಶೇಷಾ ಐತಾಳ್, ಪದ್ಮನಾಭ ಉಪಾಧ್ಯಾಯ, ಪಿ ರಾಮಕೃಷ್ಣ ಉಪಾಧ್ಯಾಯ ಇವರನ್ನು ಸನ್ಮಾನಿಸಲಾಯಿತು. ಅಲ್ಲದೆ ಶೈಕ್ಷಣಿಕ ವರ್ಷದಲ್ಲಿ ಎಸ್ಎಸ್ಎಲ್ ಸಿ ಯಲ್ಲಿ ಅತೀ ಹೆಚ್ಚು ಅಂಕಗಳಿಸಿದ ಇಬ್ಬರು ವಿದ್ಯಾರ್ಥಿಗಳಾದ ಮೊಹಮ್ಮದ್ ಶಬೀರ್ ಹಾಗೂ ಪ್ರಜ್ವಲ್ ಇವರನ್ನು ಗುರುತಿಸಿ ಸನ್ಮಾನಿಸಲಾಯಿತು.
ಈ ಸಂದರ್ಭದಲ್ಲಿ ಮದರಸದ ಗೌರವಧ್ಯಕ್ಷ ಎಚ್ ಎಸ್ ಹಮೀದ್, ಉಪಾಧ್ಯಕ್ಷ ಸಿದ್ದಿಕ್, ಜೊತೆ ಕಾರ್ಯದರ್ಶಿ ಅನಾಸ್, MJM ಕೋಡಿ ಕನ್ಯಾಣ ಇದರ ಜೊತೆಕಾರ್ಯದರ್ಶಿ ಯಾಸಿನ್, ಹಾಗೂ ಕಮಿಟಿ ಸದಸ್ಯರು ಉಪಸ್ಥಿತರಿದ್ದರು.
ಅತಿಥಿ ಅಭ್ಯಾಗತರನ್ನು ಮದರಸದ ಅಧ್ಯಕ್ಷ ಇಸ್ಮಾಯಿಲ್ ಪಿ. ಸ್ವಾಗತಿಸಿದರು.
ಮದರಸದ ಕಾರ್ಯದರ್ಶಿ ಸಾಹಿಲ್ ಕಾರ್ಯಕ್ರಮ ನಿರೂಪಿಸಿ, ವಂದಿಸಿದರು.
ಸಭಾ ಕಾರ್ಯಕ್ರಮದ ನಂತರ ಮದರಸದ ವಿದ್ಯಾರ್ಥಿಗಳಿಗಾಗಿ ಹಾಡು ಮತ್ತು ಪ್ರವಾದಿ ಸಂದೇಶ ಭಾಷಣಗಳನ್ನು ಆಯೋಜಿಸಲಾಗಿತ್ತು. ವಿದ್ಯಾರ್ಥಿಗಳು ಪ್ರವಾದಿಯವರ ಜೀವನ ಸಂದೇಶ ಕುರಿತು ಹಾಡು ಮತ್ತು ಭಾಷಣದಲ್ಲಿ ಪಾಲ್ಗೊಂಡರು.
ಸಾರ್ವಜನಿಕರಿಗೆ ಅನ್ನದಾನ ನಡೆಯಿತು.