ಡೈಲಿ ವಾರ್ತೆ: 02/JAN/2024
ಮಣಿಪಾಲ: ಹೊಸ ವರ್ಷಾಚರಣೆ ವೇಳೆ ಪುಂಡಾಟಿಕೆ ಮೆರೆದ ಯುವಕರ ಮೇಲೆ ಪ್ರಕರಣ ದಾಖಲಿಸಿ ಸಖತ್ ಕ್ಲಾಸ್ ನೀಡಿದ ಸರ್ಕಲ್ ಇನ್ಸ್ಪಕ್ಟರ್
ಮಣಿಪಾಲ: ಹೊಸ ವರ್ಷಾಚರಣೆ ಸಂದರ್ಭ ಪುಂಡಾಟಿಕೆ ಮಾಡಿದ್ದ ಯುವಕರ ಮೇಲೆ ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದಾರೆ. ಮಣಿಪಾಲ ಠಾಣೆ ವ್ಯಾಪ್ತಿಯ ಸಿಂಡಿಕೇಟ್ ಸರ್ಕಲ್ನಿಂದ ಕಾಯಿನ್ ಸರ್ಕಲ್ ವರೆಗೆ ದ್ವಿಚಕ್ರ ವಾಹನಗಳಲ್ಲಿ ಈ ಯುವಕರು ಬೇಕಾಬಿಟ್ಟಿ ರೈಡ್ ಮಾಡಿ ಮಸ್ತಿ ಮಾಡಿದ್ದರು. ಅಕ್ರಮ ಕೂಟ ಮಾಡಿಕೊಂಡು ಪುಂಡಾಟಿಕೆ ಮೆರೆದ ಏಳೆಂಟು ಯುವಕರು, ಬುಲೆಟ್ ಸೈಲೆನ್ಸ‌ರ್ನಲ್ಲಿ ಬೆಂಕಿಯ ಕಿಡಿ ಬರುವ ರೀತಿ ಅಪಾಯಕಾರಿ ರೈಡ್ ಮಾಡಿದ್ದರು.
ಇದರಿಂದ ಇತರ ವಾಹನ ಸಂಚಾರಿಗಳಿಗೆ ಅಡ್ಡಿಪಡಿಸಿ, ಬೊಬ್ಬೆ ಹೊಡೆದು ಹೊಸ ವರ್ಷವನ್ನು ಸಂಭ್ರಮಿಸಿದ್ದರು. ಸಾರ್ವಜನಿಕರ ನೆಮ್ಮದಿ ಭಂಗ, ಸುಗಮ ಸಂಚಾರಕ್ಕೆ ಅಡ್ಡಿ ಮಾಡಿದ ಆರೋಪದಲ್ಲಿ ಇದೀಗ ಪೊಲೀಸರು ಯುವಕರ ವಿರುದ್ಧ ಪ್ರಕರಣ ದಾಖಲಿಸಿಕೊಂಡು ಸಖತ್ ಕ್ಲಾಸ್ ತಗೊಂಡಿದ್ದಾರೆ.